آئی سی سی ٹیسٹ چیمپئن شپ کا فائنل مقابلہ ،بارش کے باعث چوتھے روز کا کھیل شروع نہ ہو سکا 

آئی سی سی ٹیسٹ چیمپئن شپ کا فائنل مقابلہ ،بارش کے باعث چوتھے روز کا کھیل شروع ...
آئی سی سی ٹیسٹ چیمپئن شپ کا فائنل مقابلہ ،بارش کے باعث چوتھے روز کا کھیل شروع نہ ہو سکا 

  

ساوتھمپٹن ( ڈیلی پاکستان آن لائن) بھارت اور نیوزی لینڈ کے درمیان جاری آئی سی سی ٹیسٹ چیمپئن شپ کا فائنل مقابلہ چوتھے روز بارش کے باعث شروع نہ ہو سکا ۔تیسرے روزکے کھیل کے اختتام پر نیوزی لینڈ نے بھارت کے خلاف دو وکٹوں کے نقصان پر 101رنز بنا لیے ،اس وقت کین ویلیمسن اور روس ٹیلر پچ پر موجود ہیں۔ بھارتی ٹیم پہلی اننگز میں 217رنز بنا سکی تھی۔اس اہم ترین مقابلے کا پہلا دن بھی بارش کی نذر ہو گیاتھا ،میچ میں ایک ریزرو دن بھی رکھا گیا ہے اس لیے ابھی تک امید ہے کہ میچ کا نتیجہ نکل سکتا ہے تاہم اگر بارش کے باعث میچ بے نتیجہ ختم ہو ا تو دونوں ٹیموں کو فاتح قرار دے دیا جائے گا ۔

 سا و تھمپٹن میں کھیلے جارہے آئی سی سی ٹیسٹ چیمپئن شپ کے فائنل میچ میں نیوزی لینڈ نے ٹاس جیت کر بھارت کو بلے بازی کی دعوت دی۔ بھارت کی طرف سے اوپنر آنے والے روہت شرما 88گیندوں پر 34رنز بنا کر جیمیسن کی گیند پر آوٹ ہوئے۔ان کے ساتھ آنے والے شبمن گل 64گیندوں پر 28سکور بنا کر ویگنر کی گیند پر آوٹ ہوئے۔چتیشور پجارا آٹھ سکور بنا کر بولٹ کی گیند پر آوٹ ہوئے۔تیسرے روز ویرات کوہلی 44رنز بنا کر جیمیسن کی گیند پر آوٹ ہوئے۔اجنکے ریحانے 49سکور بنا کر ویگنر کی گیند پر آوٹ ہوئے۔رشب پنت بھی اچھی کار کر دگی کا مظاہرہ نہ کرسکے اور صرف چار رنز بنا کر جیمیسن کی گیند پر آوٹ ہوئے۔رویندرا جدیجہ 15رنز بنا کر بولٹ کی گیند پر آوٹ ہوئے۔ایشون 22سکور بنا کر ٹم سودی کی گیند پر آوٹ ہوئے۔ایشانت شرما چار اور جسپریت بمہرا صفر رنز پر آوٹ ہوئے۔نیوزی لینڈ کی جانب سے جیمیسن نے پانچ ،ٹرینٹ بولٹ اور ویگنر نے دو ،دو جبکہ ٹم سودی نے ایک وکٹ حاصل کی۔نیوزی لینڈ نے پہلی اننگز میں بیٹنگ کا آغاز کیا تو ٹام لیتھم 30سکور بنا کر ایشون کی گیند پر آوٹ ہوئے۔ڈیون کونوے 54سکور بنا کر آوٹ ہوئے۔

اس سے قبل فائنل میچ کا پہلا روز بارش کی نذر ہو گیا تھا ، مسلسل بارش کے باعث گزشتہ روز ٹیمیں میدان میں ہی نہیں اتر پائیں تھیں۔آئی سی سی کے اعلان کے مطابق پہلے روز بارش کی وجہ سے فالو آن اصول تبدیل نہیں ہوگا جو عام طو پر ٹیسٹ میچز میں ہوتا ہے۔ عام طور پر فالو آن آئی سی سی کے قواعد 14.1.1 کے تحت دیا جاتا ہے ، اس میں پہلے بلے بازی کرنے والی ٹیم 200 رنز کی سبقت ملنے کے بعد مخالف ٹیم کو پھر سے بلے بازی کیلئے بلا سکتی ہے۔

 واضح رہے کہ فاتح ٹیم کو 16 لاکھ ڈالرز کی انعامی رقم دی جائے گی جبکہ دوسرے نمبر پر آنے والی ٹیم کو 8 لاکھ ڈالرز ملیں گے ، میچ ڈرا ہونے کی صورت میں انعامی رقم دونوں ٹیموں میں تقسیم کر دی جائے گی۔آئی سی سی کے مطابق ٹیسٹ چیمپئن کے پوائنٹس ٹیبل پر موجود تیسری ٹیم کو ساڑھے چار لاکھ ڈالرز ، چوتھے نمبر کی ٹیم کو ساڑھے تین لاکھ ڈالرز کی انعامی رقم دی جائے گی۔پاکستانی کرکٹ ٹیم پانچویں نمبر پر موجود ہے جسے دو لاکھ ڈالرز دیے جائیں گے۔

مزید :

کھیل -