فٹبال ورلڈ کپ کا رنگا رنگ تقریبات سے آغاز، عرب دنیا کی طرف ست سب کا خیر مقدم: امیر قطر
الخور،اسلام آباد (مانیٹرنگ ڈیسک،نیوز ایجنسیاں)قطر میں فٹ بال ورلڈکپ 2022 ء کا رنگا رنگ افتتاحی تقریب سے آغاز ہوگیا۔پہلا میچ میزبان ملک قطر اور ایکواڈور کے درمیان کھیلا گیا،قطری شہر الخور کے البیت سٹیڈیم میں افتتاحی تقریب میں عربی ثقافت کے رنگ پیش کیے گئے، افتتاحی تقریب کے باقاعدہ آغاز سے قبل ایک ویڈیو میں سمندر کے اندر، وہیل اور شارک مچھلیوں کو تیرتے دکھایا گیا، تقریب کے آغاز پر اْونٹ اور فنکار وں نے رقص کیا۔افتتاحی تقریب میں معروف ہالی وڈ اداکار مورگن فری مین نے امید، اتحاد اور برداشت کا پیغام دیا۔ورلڈ کپ میں شریک ٹیموں کے جھنڈوں کیساتھ بھی فنکاروں نے پرفارمنس پیش کی، پھر ورلڈ کپ فٹ بال کا آفیشل میسکوٹ میدان میں لایا گیا۔جنوبی کوریا کے مشہور زمانہ میوزک بینڈ، بی ٹی ایس کے سنگر جونگ کوک نے قطر کے معروف فنکار فہد الخوبیسی کے ہمراہ ورلڈ کپ کے آفیشل گانے ڈریمرز پر پرفارم کیا۔تقریب میں رقص اور موسیقی کا بھی اہتمام کیا گیا، سٹیڈیم میں شائقین کی بڑی تعداد موجود تھی۔فرانس کے1998 ورلڈکپ ونر ٹیم کیرکن مارسے ڈیسیلے نے فیفا ٹرافی کی رونمائی کی۔قطرکے امیر شیخ تمیم بن حماد الثانی نے ورلڈکپ کے باقاعدہ آغاز کا اعلان کیا، افتتاحی تقریب سے خطاب کرتے ہوئے ان کا کہنا تھا کہ فٹبال ورلڈکپ ایونٹ نے آج تمام قومیتوں، عقیدوں کو ایک جگہ جمع کر دیا، قطر اور عرب دنیا کی طرف سے ورلڈکپ 2022 میں سب کا خیر مقدم کرتے ہیں۔ سعودی ولی عہد محمد بن سلمان، ترک صدر رجب طیب اردوان، یو اے ای کے نائب صدر اور دبئی کے امیر شیخ محمدبن راشد المکتوم اور مصری صدر عبد الفتاح السیسی سمیت دیگر عالمی رہنما بھی تقریب میں شریک ہوئے۔امیر قطر کے خطاب کے بعد آتش بازی کا بھی مظاہر ہ کیا گیا اور مختصر مگر پروقار تقریب اپنے اختتام کو پہنچی۔وزیر اعظم پاکستان شہباز شریف نے حکومت پاکستان اور پاکستانی عوام کی جانب سے قطر میں فٹ بال ورلڈ کپ کی میزبانی پر شیخ خلیفہ بن حماد التھانی اور قطری عوام کو مبارکباد دیتے ہوئے نیک خواہشات کا اظہار کیا ہے۔ اپنی ایک ٹویٹ میں وزیر اعظم نے کہا کہ فٹ بال ورلڈ کپ کے موقع پر دنیا قطر کی بہترین تاریخ، ثقافت اور میزبانی سے استفادہ کرے گی۔چیئرمین سینیٹ صادق سنجرانی نے بھی امیر قطرشیخ تمیم بن حماد الثانی اوردیگر قیادت کو مبارکباد پیش کرتے ہوئے کہا کہ قطراسلامی دنیا کا واحد ملک ہے جس میں پہلی بارفٹبال کا عالمی کپ ہورہا ہے، قطر میں عالمی فٹبال میلے کا انعقاد تمام اسلامی ممالک کے لیے اہم سنگ میل ہے۔
فیفا فٹ بال
