کراچی، کامران ٹیسوری کا جامعتہ دارالعلوم میمن مسجد کا دورہ

کراچی (سٹاف رپورٹر)گورنر سندھ کامران خان ٹیسوری نے جامعتہ دارالعلوم میمن مسجد کا دورہ کیا، گورنر سندھ نے دارالعلوم کے مہتمم،انتظامیہ، اساتذہ کرام اور طلبہ سے ملاقات بھی کی۔ اس موقع پر گورنر سندھ نے کہا کہ دارالعلوم کے  نمایاں دینی ادارہ ہونے کے ساتھ ساتھ میمن مسجد ایک تاریخی ورثہ بھی ہے۔ انہوں نے کہا کہ مفتی منیب الرحمان کے زیرِ سایہ یہ ادارہ اہم خدمات انجام دے رہا ہے، مفتی صاحب نے ملک میں مذہبی رواداری و ہم آہنگی کے لئے مثالی کردار ادا کیا ہے۔ کامران خان ٹیسوری نے کہا کہ مفتی صاحب نے مدارس کو دینی تعلیمات کے ساتھ ساتھ عصر حاضر کے تقاضوں کے مطابق جو جدت بخشی وہ قابلِ تحسین ہے۔گورنر سندھ نے کہا کہ یہاں کا ہر شعبہ بہترین کام کر رہا ہے، جبکہ اسلامک فنانسنگ اور حلال فوڈز کے حوالے سے دارالعلوم کی خدمات بے مثال ہیں۔ انہوں نے مزید کہا کہ اس جیسے ادارے وقت کی اہم ضرورت ہیں، کیونکہ یہ طلبہ ہی کل ملک و قوم کے معمار ہیں۔گورنر سندھ نے کہا کہ میری دعا ہے کہ اللہ پاک اس درسگاہ کے اس فیض کو ہمیشہ جاری رکھے۔