آرمی چیف کا بحریہ اور فضائیہ ہیڈکوارٹرز کا الوداعی دورہ
راولپنڈی(ڈیلی پاکستان آن لائن)آرمی چیف جنرل قمر جاوید باجوہ نے پاک بحریہ اور پاک فضائیہ کے ہیڈ کوارٹرز کا الوداعی دورہ کیا۔
پاک فوج کے ترجمان ادارے آئی ایس پی آر کے مطابق آرمی چیف کو نیول ہیڈکوارٹرز میں پاک بحریہ کے دستے نے گارڈ آف آنر پیش کیا۔آرمی چیف کی سربراہ پاک فضائیہ ایئرچیف مارشل ظہیر احمد بابر سدھو سے بھی ملاقات ہوئی۔ آرمی چیف نے فضائی سرحدوں کا دفاع کرنے والی پاکستان ائیر فورس کی پیشہ ورانہ مہارت کو سراہااور دہشت گردی کے خلاف جنگ میں پاکستان ائیر فورس کے اہم کردار پر روشنی ڈالی۔اس موقع پر جنرل قمر جاوید باجوہ پاک بحریہ کے سربراہ ایڈمرل محمد امجد خان نیازی سے بھی ملاقات کی اور سمندری سرحدوں کے تحفظ میں پاک بحریہ کے کردار کو سراہا۔
آرمی چیف نے ہیڈ کوارٹرز راولپنڈی کور کا دورہ بھی کیا اور یادگار شہداء پر پھولوں کی چادر چڑھائی۔ افسران اور فوجیوں سے خطاب کرتے ہوئے انہوں نے سیاچن اور لائن آف کنٹرول سمیت ملکی سرحدوں کا دفاع کرنے پر راولپنڈی کور کو سراہا۔قبل ازیں آرمی چیف کی آمد پر کور کمانڈر راولپنڈی لیفٹیننٹ جنرل ساحر شمشاد مرزا نے استقبال کیا۔
