سائفر کیس، عمران خان کی انٹرا کورٹ اپیل پر فیصلہ محفوظ  ، کب سنایا جائے گا؟

اسلام آباد (ڈیلی پاکستان آن لائن) اسلام آباد ہائیکورٹ نے چیئرمین تحریک انصاف عمران خان کی سائفر کیس میں جیل ٹرائل کے خلاف انٹرا کورٹ درخواست پر فیصلہ محفوظ کر لیا جو آج شام متوقع ہے۔

نجی ٹی وی ایکسپریس نیوز کےمطابق  سابق وزیراعظم عمران خان کی درخواست پر اسلام آباد ہائیکورٹ کے 2 رکنی بینچ نے سماعت کی جس میں جسٹس گل حسن اورنگزیب اور جسٹس ثمن رفعت شامل ہیں۔ دوران سماعت عمران خان کے وکیل نے دلائل میں کہا کہ جیل ٹرائل کیلئے منظوری وفاقی کابینہ دیتی ہے، اس کیس میں 12 نومبر سے پہلے وفاقی کابینہ کی منظوری اور اس سے متعلق آرڈر موجود نہیں، یہ بنیادی غیر قانونی معاملہ ہے۔ وفاقی حکومت کو کابینہ لینے کے بعد ہائیکورٹ کے جج کو مطلع کرنا ضروری ہے۔ 

چیئرمین پی ٹی آئی کے وکیل سلمان اکرم راجہ نے مزید کہا کہ اگر وفاقی کابینہ نے منظوری دی بھی ہوئی تو اس سے پہلے کی کارروائی غیر قانونی ہے۔

عدالت نے دونوں جانب سے وکلا کے دلائل سننے کے بعد عمران خان کی درخواست پر فیصلہ محفوظ کر لیا جس کا مختصر فیصلہ آج شام متوقع ہے۔