پنجاب میں شہدائے کربلا کے چہلم پر پاک آرمی و رینجرز کی 43 کمپنیاں فرائض سر انجام دیں گی، خواجہ سلمان رفیق
لاہور ( ڈیلی پاکستان آن لائن ) صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق کی زیر صدارت محکمہ داخلہ میں اہم اجلاس ہوا ۔اجلاس میں صوبائی وزیر چوہدری شافع حسین جبکہ صوبائی وزیر بلال اکبر خان نے ویڈیو لنک کے ذریعے شرکت کی،اجلاس میں صوبہ بھر میں امن و امان کی صورتحال کا تفصیلی جائزہ لیا گیا۔سیکرٹری داخلہ پنجاب نور الامین مینگل اور متعلقہ افسران نے بریفنگ دی۔
اجلاس میں پولیس و متعلقہ اداروں کو شہدائے کربلا کے چہلم اور حضرت داتا گنج بخش علی ہجویریؒ کے عرس پر سیکیورٹی کے فول پروف انتظامات کی ہدایت کی گئی ۔
خواجہ سلمان رفیق نے کہا کہ شہدائے کربلا کے چہلم پر صوبہ بھر میں پاک آرمی و رینجرز کی 43 کمپنیاں فرائض سر انجام دیں گی، شہدائے کربلا کے چہلم پر 514 جلوسوں اور 917 مجالس کیلئے سیکیورٹی کے غیر معمولی انتظامات کی ہدایت کی گئی ہے۔محکمہ داخلہ پنجاب میں خصوصی مانیٹرنگ کیلئے کنٹرول روم قائم کیا جا رہا ہے۔
خواجہ سلمان رفیق کا مزید کہنا تھا کہ بنگلہ دیش کرکٹ سیریز کیلئے سیکیورٹی کے غیر معمولی انتظامات کی ہدایت کی گئی ہے، صوبہ پنجاب کے امن و امان کو یقینی بنانے کیلئے کوئی کسر اٹھا نہ رکھی جائے گی، عوام کو تحفظ فراہم کرنا ریاست کی بنیادی ذمہ داری ہے۔
اجلاس میں 5 قیدیوں کی پیرول پر رہائی کی منظوری دی گئی،اجلاس میں مختلف اضلاع کیلئے پرائس کنٹرول مجسٹریٹس کی تعیناتی کی منظوری بھی دی گئی۔
اجلاس میں سیکرٹری داخلہ پنجاب نور الامین مینگل، سپیشل سیکرٹری داخلہ فضل الرحمان، آئی جیل خانہ جات میاں فاروق نذیر، ایڈیشنل آئی جی چوہدری سلطان، سی سی پی او لاہور بلال صدیق کمیانہ، ڈی آئی آپریشنز پنجاب، ڈی آئی جی سپیشل برانچ، رینجرز و متعلقہ اداروں کے افسران نے شرکت کی ۔
