آخری دہشتگرد کا خاتمہ کرکے شہداء کے خون کا قرض اتاریں گے: محسن نقوی
اسلام آباد(آن لائن)وفاقی وزیرداخلہ محسن نقوی نے کہا ہے کہ قوم دہشتگردی کے خلاف جنگ کے دوران شہداء کی عظیم قربانیوں کا قرض ادا نہیں کر سکتی‘ آخری دہشتگرد کا خاتمہ کرکے شہداء کے خون کا قرض اتاریں گے۔ وفاقی وزیرداخلہ محسن نقوی نے متاثرین دہشتگردی کی یاد اور انہیں خراج تحسین پیش کرنے کے عالمی دن پر پیغام میں کہا کہ سلام ان تمام شہداء کو جنہوں نے اپنا آج ہمارے پرامن کل کے لئے نچھاور کردیا۔قوم دہشتگردی کے خلاف جنگ کے دوران شہداء کی عظیم قربانیوں کا قرض ادا نہیں کر سکتی۔ آخری دہشتگرد کا خاتمہ کرکے شہداء کے خون کا قرض اتاریں گے۔ دہشت گردی کے خلاف جنگ میں شہید ہونے والے قوم کے محسن ہیں۔دہشت گردی کے خلاف جنگ میں پاکستان کے ہر طبقے نے قربانیاں دی ہیں۔ محسن نقوی کا کہنا تھا کہ پاک افواج۔ پولیس اور قانون نافذ کرنے والے اداروں کے افسروں اور جوانوں نے اپنے لہو سے امن کی آبیاری کی ہے۔تاریخ عالم پاکستان کی لازوال قربانیوں کی کوئی اور مثال دینے سے قاصر ہے۔ پاکستان دہشت گردی سے سب سے زیادہ متاثر ملک ہے۔ دہشت گردی کیخلاف جنگ میں ہزاروں افراد شہید اور زخمی ہوئے ہیں۔حکومت اور قوم شہداء کے بہادر خاندانوں کے ساتھ کھڑی ہے۔ شہداء کے ساتھ ان کی فیملیز کو شاندار الفاظ میں خراج تحسین پیش کرتے ہیں۔آج ہم بحثیت قوم متاثرین دہشت گردی کے ساتھ مکمل یکجہتی کااظہار کرتے ہیں۔پاکستانی قوم نے غیرمتزلزل عزم اور حوصلے سے دہشتگردی کے عفریت کا سامنا کیا ہے۔ آج ہم اس عزم کا اعادہ کرتے ہیں کہ دہشتگردی کے ناسور کے خاتمے تک چین سے نہیں بیٹھیں گے اور ہمارا کل زیادہ پرامن اور محفوظ ہو گا۔
محسن نقوی
