اسلام آباد (ڈیلی پاکستان آن لائن) صدر مملکت آصف علی زرداری نے 11 ویں این ایف سی کمیشن کی منظوری دیدی ہے جس کا وزارت خزانہ کی جانب سے نوٹیفکیشن بھی جاری کر دیا گیا ۔
وفاقی وزیرخزانہ محمد اورنگزیب 9 رکنی کمیشن کے چیئرمین مقرر کر دیئے گئے ہیں، چاروں صوبائی وزرائےاعلیٰ کمیشن کے رکن ہوں گے، چاروں صوبوں سے ایک ایک ماہر رکن کمیشن میں شامل کیا گیا ہے ۔پنجاب سے ناصر محمود کھوسہ ، سندھ سے ڈاکٹر اسعد سعید ، خیبر پختوانخوا سے ڈاکٹر مشرف رسول ، بلوچستان سے ڈاکٹر فرمان اللہ این ایف سی کے رکن مقرر کر دیے گئے ہیں ، نئے این ایف سی کے ٹرمز آف ریفرنس بھی جاری کر دیئے گئے۔
کمیشن وفاق اور صوبوں کے درمیان ٹیکس محاصل کی تقسیم کیلئے سفارشات دے گا، صوبائی دائرہ اختیار میں آنے والے شعبوں کے اخراجات کا بوجھ کی تقسیم ، صوبائی حکومتوں کیلئے گرانٹس ان ایڈ کا تعین ٹی او آرمیں شامل ہے ۔
سما ٹی وی کے مطابق ذرائع کا کہنا ہے اس وقت یہ اخراجات وفاقی حکومت برداشت کر رہی ہے، بعض اخراجات وفاق اورصوبےمل کر برداشت کریں گے، این ایف سی کمیشن اس حوالے سے صدر مملکت کو اپنی سفارشات دے گا، قومی اہمیت کے منصوبوں کے مالی اخراجات شیئر کرنے سے متعلق سفارشات دی جائیں گی، کمیشن صدر مملکت کی طرف سے بھجوائے گئے کسی بھی دیگر مالی معاملے پر غور کرے گا۔
وزارت خزانہ کے مطابق خزانہ ڈویژن این ایف سی کمیشن کے سیکرٹیریٹ کا کردار ادا کرے گا، جولائی 2020 میں قائم کردہ نیشنل فنانس کمیشن تحلیل کر دیا گیا۔