ترکی سے غیر قانونی طور پر یورپ جانے والے 115 پاکستانی گرفتار

ترکی سے غیر قانونی طور پر یورپ جانے والے 115 پاکستانی گرفتار

استنبول(آئی این پی) ترکی کی سکیورٹی فورسز نے 166 غیر قانونی تارکین وطن کو گرفتار کرلیا ہے جن میں 115 پاکستانی شامل ہیں۔غیر ملکی میڈیا کے مطابق ترک سکیورٹی فورسز کو خفیہ اطلاعات ملی تھی کہ درجنوں غیر قانونی تارکین وطن سرحدی علاقے ایڈیرن سے یونان کی سرحد عبور کرنے کی منصوبہ بندی کررہے ہیں، اطلاعات کی روشنی میں ترک حکام نے الگ الگ اوقات میں 4 بسوں کو روک کر اس میں سوار پاکستان سے تعلق رکھنے والے 115 غیر قانونی تارکین کو حراست میں لے لیا۔ترک حکام کا کہنا ہے کہ یہ تمام افراد ایران کے راستے غیر قانونی طور پر ترکی میں داخل ہوئے تھے اور وہ یونان کے راستے یورپ میں داخل ہونا چاہتے تھے۔ ترک فورسز نے انسانی سمگلنگ کے الزام میں 6 ترک اور ایک پاکستانی شہری کو بھی گرفتار کیا ہے جنہوں نے غیر قانونی تارکین سے فی کس 1500 امریکی ڈالر کے مساوی رقم وصول کی تھی۔ پولیس نے عدالت سے ملزمان کا ریمانڈ حاصل کرلیا ہے۔دوسری جانب ترک حکام نے 51 شامی باشندوں کو بھی غیر قانونی طور پر یورپ جانے کی کوشش کرتے ہوئے گرفتار کیا ہے۔ گرفتار ہونے والے شامی شہریوں میں خواتین اور بچے شامل ہیں۔

مزید : ملتان صفحہ اول