حکومت کا کراچی کے لیے مزید الیکٹرک بسیں خریدنے کا فیصلہ

کراچی (اسٹاف رپورٹر)چیف سیکریٹری سندھ ڈاکٹر سہیل راجپوت نے کہا ہے کہ کراچی کے لیے مزید 15 سے 20 الیکٹرک بسز کی خریداری کی جائے گی۔منگل کو چیف سیکریٹری سندھ ڈاکٹرسہیل راجپوت سے ایشیائی ترقیاتی بینک کے وفد نے ملاقات کی، ملاقات میں بی آر ٹی ریڈ لائن منصوبے کے مسائل کو حل کرنے اور مقررہ وقت پر مکمل کرنے پر اتفاق کیا گیا۔چیف سیکریٹریسندھ نے کہاکہ کراچی میں پیپلز بس منصوبہ کامیاب رہا ہے، پنک بس کو بھی عالمی سطح پر پذیرائی ملی ہے، کراچی کے لیے مزید 15 سے 20 الیکٹرک بسز کی خریداری کی جائے گی۔ایشیائی ترقیاتی بینک کے وفد کی جانب سے کہا گیا کہ ملیر میں بائیو گیس پلانٹ کی تعمیر کے لیے زمین کی منتقلی کا مسئلہ ہے جس پر سہیل راجپوت نے وفد کو منصوبے کو مکمل کرنے میں ہر ممکن تعاون فراہم کرنے کی یقین دہانی کروائی۔اجلاس میں بتایا گیا کہ پروجیکٹ پر کے الیکٹرک اور واٹر بورڈ سمیت کئی محکموں کی انسٹالیشن موجود ہے، چیف سیکریٹری نے تمام یوٹیلٹی انسٹالیشن کی منتقلی کو یقینی بنانے کی بھی یقین دہانی کروائی۔وفدنے کہاکہ ایشیائی ترقیاتی بینک سندھ حکومت اور محکمہ ٹرانسپورٹ سے ہر ممکن تعاون جاری رکھے گا۔