اللہ کی رضا کے لیے سیاست کرنا چاہتے ہیں،مولانا محمد شیرانی

کراچی (اسٹاف رپورٹر)جمعیت علماء اسلام (رابطہ) کے مرکزی امیر مولانا محمد خان شیرانی نے کہا ہے کہ ہماری سابق جماعت مفادات کے بندر بانٹ میں مصروف تھی اور بیرون ممالک سے ملنے والی مالی اعانت ذاتی اخراجات پر خرچ کرنے لگی تھی۔دستور کی پابندی کے مطالبے پر ہمارا وجود ان کے لیے ناقابل برداشت ہوگیا جس کے باعث ہم نے جماعت سے علیحدگی اختیار کرلی۔ان خیالات کا اظہار انہوں نے شہر کے مختلف مقامات پر علماء اور معززین کے بڑے اجتماعات سے خطاب کرتے ہوئے کیا۔اس موقع پر حافظ احمد علی،مولانا اجمل قادری،مولانا عبدالمنان نقشبندی،قاری اللہ داد،سابق سینیٹر اسماعیل بلیدی،مفتی حماد مدنی،مفتی عابد،عبدالسلام شامزئی،مولانا محمود الحسن،مولانا عتیق اشرف،مولانا برکت،لیاقت علی رحمانی،مفتی عبدالخاق ہزاروی،مولانا منصور مینگل،مولانا عمیر،اسامہ احمد علی نے بھی خطاب کیا۔مولانا محمد خان شیرانی نے کہا کہ جمہوریت اور انتخابات عالمی اسٹیبلشمنٹ کی ضرورت ہیں اور وہ اس طرح پوری دنیا کو کنٹرول کررہے ہیں۔انہوں نے کہا کہ  ہم چاہتے ہیں کہ اللہ کی رضا کے لیے سیاست کی جائے اور قوم باطل نظریات کو مستر د کرکے اسلام کے فلاحی نظام کے نفاذ کے لیے متحد ہوجائے۔جمعیت علماء اسلام صوبہ سندھ کے امیر حافظ احمد علی نے مولانا شیرانی کو قائد انقلاب قرار دیا اور تمام دینی جماعتوں کے اتحاد پر زور دیا۔قبل ازیں مولانا محمد خان شیرانی کے اجتماعات میں پہنچنے پر شاندار استقبال کیا گیا۔