وفاقی کابینہ اجلاس، گرمیوں میں دفتری اوقات کا آغاز صبح ساڑھے 7 بجے کرنے کا فیصلہ
اسلام آباد (ڈیلی پاکستان آن لائن) وزیراعظم شہباز شریف کی زیر صدارت وفاقی کابینہ اجلاس میں کفایت شعاری پالیسی کے تحت گرمیوں میں دفتری اوقات ساڑھے 7 بجے سے شروع کرنے سمیت متعدد اہم فیصلے کر لئے گئے۔
نجی ٹی وی ڈان نیوز کے مطابق وزیراعظم شہباز شریف کا کابینہ اجلاس سے خطاب کے دوران کہنا تھا کہ ہمیں ملک و قوم کیلئے قربانی دینی ہو گی۔ موجودہ حالات کفایت شعاری پالیسی کا تقاضا کرتے ہیں، وفاقی وزرا اور سرکاری افسران کو پہلے سے زیادہ کفایت شعاری کا مظاہرہ کرنا ہو گا۔ جب بھی قدرتی آفت آئی، غریب آدمی ہی پسا ہے۔ آئی ایم ایف پروگرام جلد مل جائے گا، چند ایک نکات رہ گئے ہیں جو جلد طے کر لئے جائیں گے۔
کابینہ اجلاس میں کفایت شعاری پالیسی سے متعلق بھی فیصلے کئے گئے جن کے تحت وفاقی وزرا، وزرائے مملکت اور مشیر تنخواہیں اور الاونسز نہیں لیں گے۔ وزرا گیس، بجلی اور پانی کے بل جیب سے ادا کریں گے۔ وزرا سے تمام لگثرری گاڑیاں واپس لی جائیں گی۔ ہر وزیر کو سکیورٹی کیلئے صرف ایک گاڑی دی جائے گی۔ کابینہ اراکین اندرون و بیرون ملک اکانومی کلاس میں سفر کریں گے۔ فائیو سٹار ہوٹلز میں ٹھہرنے پر پابندی ہو گی۔
کفایت شعاری دستاویز کے مطابق جون 2024 تک سرکاری استعمال کیلئے ہر قسم کی گاڑی کی خریداری پر پابندی ہو گی، سرکاری افسران بیرون ممالک دوروں پر نہیں جا سکیں گے، ناگزیر دوروں پر اکانومی کلاس میں سفر کریں گے۔ سرکاری افسران کو صرف ایک گاڑی دی جائے گی۔ گاڑیوں کے غلط استعمال پر ایکشن ہو گا۔ اخراجات بچانے کیلئے ٹیلی کانفرنسنگ کو فروغ دیا جائے گا۔
ملک میں آئندہ 2 برس تک نئے ڈویژنز، اضلاع اور تحصیلیں بنانے پر پابندی ہو گی۔ یکم مارچ سے کسی بھی افسر کو ایک سے زیادہ پلاٹ الاٹ نہیں ہوں گے، ایک ہزار مربع گز سے زائد سرکاری رہائش گاہوں کو فروخت کیا جائے گا۔
