’’مڈل اوورز کی بیٹنگ نے فرق پیدا کیا‘‘ بھارت سے جیت کے بعد  جنوبی افریقی کپتان ایڈن مارکرم کا ٹیم کی کارکردگی پر اطمینان

کولمبو(ڈیلی پاکستان آن لائن) جنوبی افریقہ کے کپتان ایڈن مارکرم نے ٹیم کی حالیہ شاندار کارکردگی کو سراہتے ہوئے کہا ہے کہ پچ کی صورتحال کو بھانپ کر اس کے مطابق پلان تبدیل کرنا اور مڈل اوورز میں بہترین بیٹنگ جیت کی کلید ثابت ہوئی۔

ایڈن مارکرم نے میچ کے بعد گفتگو کرتے ہوئے پچ کی مختلف نوعیت پر بات کی۔ انہوں نے کہا یہاں کی پچ اب تک کھیلے گئے دیگر میچوں سے مختلف اور تھوڑی’’اسپنجی‘‘ (Spongy) تھی، جہاں گیند آسانی سے بلے پر نہیں آ رہی تھی۔

پروٹیز کپتان کے مطابق ان کا پلان گیپس میں شاٹس کھیل کر زیادہ سے زیادہ دوڑ کر رنز بنانے کا تھا۔ انہوں نے ڈیوالڈ بریوس اور ڈیوڈ ملر کے درمیان ہونے والی پارٹنرشپ کی تعریف کرتے ہوئے کہا کہ اس شراکت داری نے جنوبی افریقہ کو میچ میں برقرار رکھا۔
ایڈن مارکرم نے اپنے باؤلرز خصوصاً لنگی نگیڈی کی کارکردگی پر خوشی کا اظہار کیا۔ انہوں نے کہا کہ نگیڈی مڈل اوورز میں ہمیشہ حریف ٹیم کے لیے خطرہ ثابت ہوتے ہیں اور اہم وکٹیں لینے کی صلاحیت رکھتے ہیں۔

انہوں نے مزید کہا کہ ٹورنامنٹ کا آغاز مشکل تھا لیکن آج باؤلرز نے جس طرح گیند بازی کی وہ لاجواب تھی۔

فیلڈنگ کے حوالے سے بات کرتے ہوئے مارکرم نے اعتراف کیا کہ اگرچہ2 کیچز ڈراپ ہوئے، لیکن مجموعی طور پر ٹیم پہلے سے زیادہ متحد نظر آئی۔ انہوں نے متحدہ عرب امارات (UAE) کے خلاف میچ کا حوالہ دیتے ہوئے کہا کہ آج ٹیم کا آپس میں تال میل  گزشتہ میچ کے مقابلے میں بہت بہتر تھا۔