سانحہ سیالکوٹ، کولمبو میں پریانتھاکماراکی یاد میں منعقدہ تقریب کے دوران بیوہ نے حکومت پاکستان سے بڑی اپیل کردی

سانحہ سیالکوٹ، کولمبو میں پریانتھاکماراکی یاد میں منعقدہ تقریب کے دوران ...
سانحہ سیالکوٹ، کولمبو میں پریانتھاکماراکی یاد میں منعقدہ تقریب کے دوران بیوہ نے حکومت پاکستان سے بڑی اپیل کردی

  

کولمبو(مانیٹرنگ ڈیسک) سری لنکا کے دارالحکومت کولمبو میں پاکستانی ہائی کمیشن کی طرف سے پاکستان میں مشتعل ہجوم کے ہاتھوں قتل ہونے والے پریانتھا کمار اکی یاد میں ایک تقریب کا انعقاد کیا گیا جس میں مقتول کی فیملی نے بھی شرکت کی۔ اس تقریب میں گفتگو کرتے ہوئے 48سالہ مقتول پریانتھا کی بیوہ نیلوشی ڈیسانیاکا نے پاکستانی حکومت سے اپیل کی ہے کہ وہ اس کے شوہر کے قاتلوں کو کیفر کردار تک پہنچائے۔ 

رپورٹ کے مطابق پاکستانی ہائی کمشنر عمر فاروق برکی طرف سے منعقد کی گئی اس تقریب میں سری لنکا کے سپیکر پارلیمنٹ، وزراءاراکین اسمبلی اور مسلم و بدھ مت کے مذہبی رہنماﺅں سمیت کئی اعلیٰ شخصیات نے شرکت کی۔تقریب میں نیلوشی ڈیسانیاکا اپنے دو بیٹوں کے ہمراہ شریک ہوئی اور وزیراعظم عمران خان سے اپیل کی کہ وہ جلد از جلد قاتلوں کو سزا دلوائیں۔ 

نیلوشی کا کہنا تھا کہ ”میرے شوہر کے قاتلوں کو سزا دینے کا مقصد انتقام لینا نہیں ہے بلکہ اس کا مقصد یہ ہے کہ آئندہ کسی اور کے ساتھ ایسا سلوک نہ ہو۔میں تمام پاکستانیوں کی مشکور ہوں جنہوں نے اس مشکل وقت میں ہمارا ساتھ دیا اور اس تقریب کا انعقاد کرنے پر میں پاکستانی ہائی کمیشن کی بھی مشکور ہوں۔میں اپنی سپورٹ کرنے پر سری لنکن صدر، وزیراعظم، وزراءاور میڈیا کا بھی شکریہ ادا کرتی ہوں۔“

رپورٹ کے مطابق پریانتھا کمار کے قتل کا انسانیت سوز واقعہ سیالکوٹ میں پیش آیا تھا۔ اس واقعے کے بعد سیالکوٹ کی کاروباری کمیونٹی نے مقتول کی فیملی کی مالی مدد کے لیے 1لاکھ ڈالر کی رقم جمع کی تھی اور اعلان کیا تھا کہ اس امدادی رقم کے علاوہ سیالکوٹ کی بزنس کمیونٹی آئندہ 10سال کے لیے مقتول کی فیملی کو ماہانہ 2ہزار ڈالر تنخواہ دیتی رہے گی۔

تقریب سے خطاب کرتے ہوئے پاکستانی ہائی کمشنر نے بتایا کہ ”سیالکوٹ کی بزنس کمیونٹی کی طرف سے اکٹھی کی گئی رقم مقتول کی بیوہ تک پہنچا دی گئی ہے۔ اس کے علاوہ امریکہ اور کینیڈا میں مقیم پاکستانیوں نے بھی مقتول کی فیملی کے لیے 54ہزار ڈالر کی رقم اکٹھی کی تھی۔ وہ بھی ان تک پہنچا دی گئی ہے۔ “

مزید :

بین الاقوامی -