ڈرون حملے ہماری خود مختاری کے خلاف ہیں ،پاکستان اسے برداشت نہیں کرے گا :ترجمان دفتر خارجہ

اسلام آباد (ڈیلی پاکستان آن لائن )امریکہ کی جانب سے پاکستان سے متعلق پالیسیا ں مزید سخت کرنے کے حوالے سے پاکستان نے واضح کردیا ہے کہ پاکستان ڈرون حملے برداشت نہیں کر ے گا ۔

دفتر خارجہ میں ہفتہ وار بریفنگ دیتے ہوئے ترجمان دفتر خارجہ نفیس ذکریا نے کہا ہے کہ ڈرون حملے پاکستانی کی خود مختاری کے خلاف ہیں ،پاکستان ڈرون حملے برداشت نہیں کرے گا ۔انہوں نے کہا کہ ڈرون حملوں سے متعلق عالمی سطح پر پاکستان کا موقف واضح ہے ۔ان کا کہنا تھا کہ پاکستان امریکہ کے ساتھ اپنے تعلقات کو بہت اہمیت دیتا ہے ۔ان کا کہنا تھا کہ پاکستان اور چین افغانستان میں قیام امن کے لیے سنجیدہ کوششیں کر رہے ہیں ،پاکستان نے اپنے اطرف سرحدی باڑ لگانے کا سلسلہ شروع کر رکھا ہے ،بارڈر مینجمنٹ سے دہشت گردوں کو روکنے میں مدد ملے گی ۔انہوں نے بتا یا چینی وزیر خارجہ رواں ہفتے پاکستان کا دورہ کریں گے جن کے ساتھ افغان امن عمل سمیت دیگر اہم موضاعات پر تبادلہ خیال کیا جائے گا ۔
واضح رہے کہ غیر ملکی خبر رساں ادارے نے ایک رپورٹ میں کہا ہے کہ ٹرمپ انتظامیہ نے پاکستان سے متعلق پالیسیاں مزید سخت کرنے کافیصلہ کر لیا ہے جس کے تحت اب پاکستان میں ایک بار پھر سے ڈرون حملے کیے جائیں گے ۔