علامہ طالب جوہری کی نمازجنازہ ادا ،وادی حسین قبرستان میں سپرد خاک

علامہ طالب جوہری کی نمازجنازہ ادا ،وادی حسین قبرستان میں سپرد خاک
علامہ طالب جوہری کی نمازجنازہ ادا ،وادی حسین قبرستان میں سپرد خاک

  

کراچی(آئی این پی ) معروف شیعہ عالم دین علامہ طالب جوہری کی نماز جنازہ امروہہ گراؤنڈ میں ادا کردی گئی۔

تفصیلات کے مطابق پاکستانی ٹیلی ویڑن پر طویل عرصے تک شام غریباں کی مجلس پڑھنے والے معروف شیعہ عالم دین علامہ طالب جوہری اتوار کی رات انتقال کرگئے تھے جن کی نماز جنازہ ادا کردی گئی۔ طالب جوہری کی نمازجنازہ امروہہ گراونڈ میں بعد نماز ظہرین انچولی میں ادا کی گئی، مرحوم کی تدفین سپرہائی وے پر واقع وادی حسین قبرستان میں کی جائے گی۔ علامہ کچھ عرصے سے دل اور ہائپوگلیسیمیا کے مرض میں مبتلا تھے اور انہیں حال ہی میں کراچی کے ایک اسپتال میں داخل کروایا گیا تھا، جہاں وہ 81 برس کی عمر میں دوران علاج دم توڑ گئے۔

وہ 27 اگست 1939 کو پٹنہ ’بھارت‘ میں پیدا ہوئے۔ اپنے مخصوص انداز، لہجے اور خطابت کے باعث ایک الگ مقام اور احترام رکھتے تھے۔ ان کے والد مشہور عالم دین علامہ مصطفیٰ خاں جوہر تھے۔ انہیں کئی برسوں سے پاکستانی علماء میں مرکزی حیثیت حاصل تھی۔

کراچی کے نشتر پارک میں شام غریباں کی مجلس سے ان کی شہرت پاکستان اور پاکستان سے باہر دنیا بھر میں پھیل گئی، اس مجلس کے سامعین میں مسلمانوں کے تمام طبقہ ہائے فکر شامل تھے۔ علامہ طالب جوہری کو حکومت پاکستان کی جانب سے ان کی دینی خدمات کے اعتراف میں ستارہ امتیاز سے بھی نوازا جا چکا ہے۔

مزید :

علاقائی -سندھ -کراچی -