برطانوی شہر برمنگھم میں 5 مساجد پر حملہ

برطانوی شہر برمنگھم میں 5 مساجد پر حملہ
برطانوی شہر برمنگھم میں 5 مساجد پر حملہ

  


برمنگھم (ڈیلی پاکستان آن لائن)برطانوی شہر برمنگھم میں رات گئے 5 مساجد پر حملہ کیا گیا ۔ برطانیہ کی انسداد دہشتگردی پولیس نے واقعے کی تحقیقات کا آغاز کردیا ہے۔

پولیس کے مطابق نامعلوم افراد نے رات گئے برمنگھم شہر میں ویٹن روڈ اسلامک سنٹر سمیت 5 مساجد پر ہتھوڑوں سے حملہ کیا اور توڑ پھوڑ کی۔ برمنگھم کونسل آف مساجد کے مطابق کم از کم تین مساجد پر حملہ کیا گیا ہے جو کہ ہینڈز ورتھ، آسٹن اور ویٹن کے علاقوں میں واقع ہیں۔کونسل نے مساجد کی انتظامیہ کو ہدایت کی ہے کہ وہ کسی بھی واقعے سے متعلق فوری طور پر قانون نافذ کرنے والے اداروں کو آگاہ کریں تاکہ کسی بھی نقصان سے بچا سکے۔

فوٹو: ٹوئٹر

کونسلر مجید محمود نے مساجد میں پیش آنے والے واقعات کی تصاویر اور ویڈیوز ٹوئٹر پر شیئر کی ہیں۔ انہوں نے بتایا کہ ویٹن روڈ اسلامک سنٹر پر اکیلے آدمی نے ہتھوڑے سے رات گئے حملہ کیا تھا۔

پولیس کا کہنا ہے کہ انہیں رات کو 2 بج کر 32 منٹ پر برچ فیلڈ روڈ کی مسجد میں بلایا گیا تھا جہاں ایک شخص مسجد کے شیشے توڑ رہا تھا، جب پولیس وہاں پہنچی تو حملہ آور فرار ہوچکا تھا۔ اس کے کچھ ہی دیر بعد پولیس کو اطلاع ملی کہ ایرڈنگٹن کے علاقے میں واقع سلیڈ روڈ مسجد میں بھی اسی قسم کی توڑ پھوڑ کی جارہی ہے۔

پولیس کو ویٹن روڈ، آسٹن اور پیری روڈ سے بھی اسی قسم کے حملوں کی اطلاعات موصول ہوئیں تو پورے شہر کی مساجدکی سکیورٹی بڑھادی گئی۔ برطانیہ کی انسداد دہشتگردی پولیس نے واقعے کی تحقیقات کا آغاز کردیا ہے۔ سوشل میڈیا پر مساجد پر حملوں کی سی سی ٹی وی فوٹیجز بھی وائرل ہورہی ہیں جن میں مساجد میں کی جانے والی توڑ پھوڑ دیکھی جاسکتی ہے۔

مزید : اہم خبریں /بین الاقوامی /برطانیہ