آئی ایم ایف کی ڈکٹیشن پر بجٹ کی تیاری قابل قبول نہیں: پیففا

 لاہور/کراچی(این این آئی)پاکستان انٹرنیشنل فریٹ فاروڈرز ایسوسی ایشن نے کہا ہے کہ ابھی تک کئی شعبے کورونا وباء کی مشکلا ت سے چھٹکارا نہیں پا سکے اورحکومت نے آئی ایم ایف کی ڈکٹیشن پر عمل پیرا ہو کرمشکلات میں مزید اضافہ کر دیا ہے،عالمی ادارے کی مرضی کے مطابق بجٹ کی تیاری معیشت کے لئے زہر قاتل ثابت ہوگی،فریٹ فارورڈرز کو ٹیکس آڈٹ سے پانچ سال کیلئے استثنیٰ اور ٹرن اوور ٹیکس کو کم کیا جائے۔ ان خیالات کااظہارچیئرمین محمد الیاس چودھری،،سینئر وائس چیئرمین اسد احمد،وائس چیئرمین عاشق علی باجوہ،سابق چیئرمین جمیل احمد،اظہارالحق قمر،ایگزیکٹو ممبران توقیر ملک،اصغرملک،علی عدنان اورصہیب زیدی نے مشترکہ بیا ن میں کیا۔ انہوں نے کہا کہ حکومت موجودہ مشکل حالات میں ٹیکس ریلیف دینے کی بجائے پہلے سے دی گئی ٹیکس چھوٹ کو بھی ختم کررہی ہے جو ٹیکس دینے والوں کے ساتھ نا انصافی ہے۔ انہوں نے کہا کہ ٹیکسوں کی شرح بہت زیادہ ہونے کی وجہ سے لاکھوں فریٹ ممبران کا مستقبل خطرے میں ہے۔حکومت سے مطالبہ ہے کی ٹرن اوور ٹیکس ریٹ کم کر کے ٹیکس آڈٹ سے پانچ سالوں کیلئے استثنیٰ دیا جائے۔
تاکہ کورونا وباء سے مشکلات کاشکارہونے والا یہ شعبہ دوبارہ اپنے پاؤں پر کھڑا ہوسکے۔