کرپشن اور مہنگائی ختم کئے بغیر مثالی معاشرہ قائم نہیں ہو سکتا،میاں مقصود

لاہور(نمائندہ خصوصی)امیرجماعت اسلامی پنجاب میاں مقصود احمدنے کہاہے کہ عوام مہنگائی کی چکی میں بری طرح پس رہے ہیں۔لوگوں کودووقت کی روٹی میسر نہیں ہے،لوڈشیڈنگ نے بھی عوام کی زندگی اجیرن کردی ہے،بجلی کی عدم دستیابی کی وجہ سے مختلف شہروں میں ان گنت صنعتیں بند پڑی ہیں،غیر اعلانیہ لوڈشیڈنگ سے کاروبار زندگی عملاً مفلوج ہوکر رہ گیا ہے، مہنگائی ، غربت اور بیروزگاری کے خاتمے سمیت کئی بڑے چیلنجوں سے نمٹنا وقت کااہم تقاضا ہے۔انہوں نے کہاکہ حکومت کو چاہیے کہ گڈگورننس کیلئے اپنی تمام ترصلاحیتوں کوبروئے کار لائے،مہنگائی اور کرپشن کے خاتمے کے بغیر ملک میں عدل وانصاف پرمبنی معاشرہ قائم نہیں ہوسکتا۔انہوں نے کہاکہ ملکی ترقی میں سب سے بڑی رکاوٹ کرپشن ہے جب تک کرپٹ عناصرکے خلاف بلاتفریق کارروائی اور ملک وقوم کی لوٹی ہوئی دولت واپس نہیں لائی جاتی ملک ترقی کی راہ پر گامزن نہیں ہوسکتااس وقت سوئس بنکوں میں پاکستانیوں کی200ارب ڈالر سے زائدلوٹی گئی رقم جمع ہے اگر یہ ساراپیسہ ملک میں واپس آجائے توتمام مسائل حل ہوسکتے ہیں۔انہوں نے کہاکہ ایک طرف کرپشن عروج پر ہے تودسری جانب حکومت قرض پر قرض لے کر اپنے اخراجات پورے کررہی ہے، مسلسل قرضے لینے کی وجہ سے آج ہر پاکستانی ایک لاکھ سے زائد کا مقروض ہوچکا ہے۔میاں مقصود احمد نے مزیدکہاکہ وطن عزیزوسائل سے مالامال ملک ہے اس کی زمین زرخیز ، سمندراور پہاڑ معدنیات سے بھرے ہوئے ہیں۔تھر میں75ارب ٹن کوئلے کے ذخائر موجود ہیں،سندھ میں قدرتی گیس کے وسیع ذخائر ہماری ملکی معیشت کارخ بدل سکتے ہیں۔ضرورت اس امر کی ہے کہ حکمرانوں کواپنی ترجیحات بدلنے کیساتھ ساتھ ملک سے کرپشن کے ناسور کو ختم کرکے گڈگورننس،کفایت شعاری کواپناناہوگا۔