یوم الغضب، فلسطینیوں کے پرامن مظاہروں پر اسرائیلی فوج کے حملے
رام اللہ (این این آئی) فلسطین کے مقبوضہ مغربی کنارے، غزہ کی پٹی اور بیت المقدس میں گزشتہ روز ’یوم الغضب‘ کے مظاہروں کے دوران اسرائیل فوج نے مظاہرین پر طاقت کا وحشیانہ استعمال کیا ہے جس کے نتیجے میں کم سے کم 160 شہری زخمی ہوگئے ۔ فلسطینی وزارت صحت کی جانب سے جاری رپورٹ میں بتایا گیا ہے کہ فلسطین کے مختلف شہروں میں جمعہ کو نماز جمعہ کے اجتماعات کے بعد شام 9 بجے تک اسرائیل فوجیوں نے فلسطینی مظاہرین پر تشدد کا وحشیانہ استعمال کیا جس کے نتیجے میں 160 شہری زخمی ہوئے ہیں۔ رپورٹ کے مطابق 69 فلسطینی اسرائیلی فوج کی براہ راست فائرنگ کے نتیجے میں زخمی ہوئے۔ زخمیوں میں سے 33 کا تعلق غزہ کی پٹی سے ہے۔ 12 فلسطینیوں کو دھاتی گولیوں سے نشانہ بنایاگیا۔ غزہ کی پٹی میں 12 مظاہرین دھاتی گولیوں سے زخمی ہوئے جبکہ مغربی کنارے میں 41 شہریوں کودھاتی گولیوں سے نشانہ بنایا گیا۔ رام اللہ میں اسرائیلی فوج کی فائرنگ سے 29 مظاہرین زخمی ہوئے۔ ان میں دو کو دھاتی گولیوں سے نشانہ بنایاگیا۔ 13 مظاہرین کو موقع پر ہی طبی امداد فراہم کی گئی۔ الخلیل شہر میں 35 فلسطینی زخمی ہوئے، بیت لحم میں 10 قلقیلیہ میں 3 کو براہ راست گولیاں لگیں جب کہ 24 فلسطینی دھاتی گولیوں اور آنسو گیس کی شیلنگ سے زخمی ہوئے۔
