جہلم ، قرآن پاک کی بے حرمتی کیخلاف مظاہرے ، فیکٹری نذرآتش ، حالات کشیدہ ، فوج طلب
جہلم(این این آئی)جہلم میں مبینہ طور پر قرآن پاک کے مقدس اوراق نذر آتش کرنیکی اطلاعات پر ایک فیکٹری کو آگ لگا دی گئی ٗمشتعل ہجوم نے پولیس کے خلاف شدید نعرے بازی کی ٗ جی ٹی روڈ ٹریفک کیلئے بند کر دیا ٗ پولیس اورمشتعل افراد کے درمیان جھڑپیں ہوئیں پولیس کی جانب سے ربڑ کی گولیاں اور آنسو گیس کے شیلز فائر کیے گئے ٗ جس کے نتیجے میں تین افراد زخمی ہوگئے ٗ پولیس حالات کو کنٹرول کر نے میں ناکام رہی ٗ فوج نے پہنچ کر ٹریفک بحال کر ادی ۔میڈیا رپورٹس کے مطابق جی ٹی روڈ کے قریب اسمال انڈسٹریل اسٹیٹ کے عقب میں واقع ایک چِپ بورڈ بنانے والی فیکٹری میں قرآن پاک کی مبینہ بے حرمتی کی اطلاعات ملنے پرپولیس کی جانب سے واقعے میں ملوث ہونے کے شبہ میں 5 افراد کو حراست میں لیا گیا جن میں سے 4 کو بعدازاں رہا کردیا گیاسینئر پولیس افسر عدنان ملک نے بتایا کہ قرآن پاک کی مبینہ بے حرمتی کے الزام میں فیکٹری کے سیکیورٹی ہیڈ قمر احمد طاہر کو گرفتار کرلیا گیاپولیس کے مطابق فیکٹری کے ایک ملازم نے بتایا کہ ملزم طاہر نے فیکٹری کے بوائلر میں قرآن پاک کے اوراق نذر آتش کرنے کی نگرانی کی اور اس حرکت کو روکے جانے پر مداخلت بھی کی۔پولیس کے مطابق ملزم طاہر کے خلاف توہین مذہب کے قانون کے تحت مقدمہ درج کرلیا گیا۔واقعہ کے بعد لاؤڈ اسپیکر پر مساجد سے اعلان کرائے گئے اور اطراف کے 4 ٗ 5 گاؤں کے لوگ ایک ہجوم کی صورت میں جمع ہوگئے اور انھوں نے مذکورہ فیکٹری اور اس سے ملحق فیکٹری مالک کے گھر کو بھی آگ لگا دی تاہم فیکٹری مالک اور دیگر ملازمین فیکٹری سے نکلنے میں کامیاب ہوگئے۔مشتعل ہجوم نے پولیس کے خلاف نعرہ بازی بھی کی اور جی ٹی روڈ کو ٹریفک کیلئے بند کردیا گیا ٗہجوم کو منتشر کرنے کے لیے پولیس جائے وقوع پر پہنچی، اس دوران پولیس اور مشتعل افراد کے درمیان جھڑہیں بھی ہوئیں ٗپولیس کی جانب سے ربڑ کی گولیاں اور آنسو گیس کے شیلز فائر کیے گئے جبکہ مشتعل افراد کی جانب سے بھی ہوائی فائرنگ کی گئی، اس دوران 3 افراد کے زخمی ہونے کی بھی اطلاعات موصول ہوئیں، تاہم نفری کم ہونے کی وجہ سے پولیس حالات پر قابو پانے میں ناکام ر ہی ٗڈی سی او مجاہد اکبر خان موقع پر پہنچے تاہم مشتعل ہجوم سے مذاکرات میں ناکام رہے بعد ازاں فوج کو طلب کیا گیا اور تقریباً 6 گھنٹے بعد جی ٹی روڈ کو ٹریفک کے لیے بحال کردیا گیا جبکہ راولپنڈی اور دیگر اضلاع سے بھی پولیس کی نفری کو علاقے میں تعینات کردیا گیا۔
اسلام آباد(آئی این پی)وفاقی وز یر داخلہ چوہدری نثار علی خان نے جہلم میں فیکٹری کو آگ لگانے اور امن عامہ کی صورتحال کا نوٹس لیتے ہوئے شہر میں فوری طور پر فوج کی تعینات کر نے کا حکم دے دیدیا اور کہا ہے کہ کسی کو قانون ہاتھ میں لینے کی اجازت نہیں ہونی چاہیے۔ تفصیلات کے مطابق ہفتہ کو وفاقی وز یر داخلہ چوہدری نثار علی خان نے جہلم میں فیکٹری کو آگ لگانے کے واقع کا نوٹس لے لیا ہے اور شہر میں فوری طور پر فوج تعینات کر نے کا حکم دیا ہے ۔وزیر داخلہ کا کہنا ہے کہ پاک فوج جہلم میں امن کی بحالی اور کسی بھی ناخوش گوار واقعے کو روکنے کیلئے پنجاب حکوت کی رہنمائی میں اپنی قانونی اور آئینی ذمہ داریاں پوری کرے، کسی کو قانون ہاتھ میں لینے کی اجازت نہیں ہونی چاہیے۔
