"سانس کی مہلت کیا کرلے گی" معروف شاعرہ سیما غزل شدید علیل، حکومت سے تعاون کی اپیل

کراچی (ڈیلی پاکستان آن لائن) " سانس  کی مہلت کیا کرلے گی۔۔۔ اب یہ سہولت کیا کرلے گی" جیسے متعدد لازوال اشعار کی خالق پاکستان کی معروف شاعرہ  اور ڈرامہ نویس سیما غزل نے پھیپھڑوں کے ٹرانسپلانٹ کیلئے صدر مملکت اور وزیر اعظم عمران خان سے تعاون کی اپیل کردی۔

سیما غزل نے اپنے ایک ویڈیو پیغام میں کہا کہ وہ پھیپھڑوں کی بیماری میں مبتلا ہیں جس کیلئے انہیں فوری ٹرانسپلانٹ کی ضرورت ہے۔ ان کا ٹرانسپلانٹ پاکستان میں ممکن نہیں ہے بلکہ اس کیلئے امریکہ جانا پڑے گا جہاں کیلی فورنیا اور ٹیکساس میں یہ ممکن ہوسکتا ہے۔

انہوں نے کہا کہ جہاں اتنے لوگ مرجاتے ہیں وہاں کسی ایک کو بچانے کیلئے جدو جہد کی جائے گی جو بہت سے لوگوں کیلئے امید بنے گی۔ انہیں امید ہے کہ حکومت ان کی مدد کیلئے آگے بڑھے گی اور ان کے علاج میں تعاون کرے گی۔

"سانس کی مہلت کیا کرلے گی ۔۔۔ اب یہ سہولت کیا کرلے گی"
معروف شاعرہ، ڈرامہ نویس سیما غزل پھیپھڑوں کی بیماری میں مبتلا، وزیر اعظم اور صدر سے امداد کی اپیل pic.twitter.com/0OAA0JX54f

— Sarfraz Raja (@Sarfraz_Raja90) November 22, 2021

سیما غزل کی پوری غزل

سانس  کی مہلت کیا کرلے گی

اب یہ سہولت کیا کرلے گی

بے بس کرکے رکھ دے گی نا

اور محبت کیا کرلے گی

کیا کرلے گا چارہ گر بھی

درد کی شدت کیا کرلے گی

ایک جہنم کاٹ لیا ہے

اب یہ قیامت کیا کرلے گی

میں ہی اپنے ساتھ نہیں جب

اس کی رفاقت کیا کرلے گی

میرا آنگن صحرا جیسا

دشت کی وحشت کیا کرلے گی