پاناما لیکس پر عدالتی نوٹس سے حکومتی کشتی ڈولنے لگی ،حکمرانوں کو بھاگنے نہیں دینگے :سراج الحق

پاناما لیکس پر عدالتی نوٹس سے حکومتی کشتی ڈولنے لگی ،حکمرانوں کو بھاگنے ...

  

لاہور(اے این این )امیر جماعت اسلامی پاکستان سینیٹر سراج الحق نے کہاہے کہ کچھ لوگ چاہتے تھے کہ پانامہ ،دبئی اور لندن لیکس کے معاملہ کو دبا کر قومی خزانہ سے لوٹا گیا کھربوں روپیہ ڈکار لیا جائے مگر اب ان کی یہ چالیں کامیاب نہیں ہونگی ۔،عوام احتساب کے مطالبے سے پیچھے ہٹنے والے نہیں ۔انہوں نے کہا کہ عدالت سے نوٹس ملتے ہی حکومتی کشتی ڈولنے اور حکومتی مشینری شور مچانے لگی ہے ۔انہوں نے کہا کہ حکمرانوں کو اب بھاگنے کا موقع نہیں ملے گا عوام حکومتی مظالم اور کرپشن و مہنگائی کے ہاتھوں اس قدر تنگ آچکے ہیں کہ کسی طرف سے بھی حکمرانوں کے حق میں کوئی آواز سنائی نہیں دیتی۔ ان خیالات کا اظہار انہوں نے جامع مسجد منصورہ میں جمعہ کے بڑے اجتماع سے خطاب کرتے ہوئے کیا۔انہوں نے کہا کہ کرپشن نے ملک کی جڑیں کھوکھلی کردی ہیں ،لٹیروں کے ٹولے نے قومی خزانے کو شیر مادر سمجھ رکھا ہے ۔سینیٹر سراج الحق نے کہا کہ جماعت اسلامی عدالتوں اور عوام دونوں جگہ اپنی جدوجہد جاری رکھے گی ۔سینیٹر سراج الحق نے کہا کہ ہم پہلے دن سے حکمرانوں کو احتساب کا نظام بنانے اور لوٹی گئی قومی دولت واپس کرنے پر زور دیتے رہے ہیں لیکن حکمران مسلسل ٹال مٹول اور ڈنگ ٹپاؤ پالیسی سے کام لیتے رہے ۔انہوں نے کہا کہ حکمرانوں نے ملک کوترقی دی نہ نظریاتی شناخت کا تحفظ کیا ،پروپیگنڈے کے زور پر حکومت نہیں چلتی، حکومت نے قوم کا وقت اورپیسہ ضائع کیا،حکمرانوں کے پاس اب کہنے کو کچھ نہیں رہا،حکومتی کشتی زیادہ دیر تیرتی نظرنہیں آتی۔ حکومت اس کشتی پر سوار ہے جس کے پیندے میں سوراخ ہے اور پانی تیزی سے اندر آرہا ہے ،اب بچے گا وہی جو اس ڈوبتی کشتی سے چھلانگ لگائے گا۔اچھا ہوتا اگر حکومت اپنے اوردوسروں کیلئے احتساب کا نظام بناتی ۔احتساب میں جتنی تاخیر ہوگی عوام کے غیظ و غضب میں اتنا ہی اضافہ ہوگا۔مصطفی کمال اور عشرت العباد کے ایک دوسرے کے بارے میں سچ کا عدالتوں کو فوری نوٹس لینا چاہئے۔انہوں نے کہا کہ جماعت اسلامی خیبر پختونخواہ کا صوبائی اجتماع 22.23اکتوبر کو اضاخیل میں ہوگا جس میں صوبہ بھر سے لاکھوں لوگ شریک ہونگے اور یہ اجتماع خیبر پختونخواہ کی آئندہ سیاست کا رخ متعین کریگا اور ملک میں اسلامی انقلاب کا پیش خیمہ ثابت ہوگا ۔28,29,30اکتوبر کو جماعت اسلامی پنجاب کا صوبائی اجتماع لاہور میں ہوگا جس کے آخری دن اسلامی انقلاب مارچ کیا جائیگا جس میں پنجاب بھر سے لاکھوں عوام شرکت کرینگے ۔انہوں نے کہا کہ اس کے بعد سندھ میں ورکرز کنونشن ہوگا ۔جماعت اسلامی ملک بھر کے عوام کی ترجمان جماعت ہے ،ہم پاکستان کی نظریاتی اور جغرافیائی سرحدوں کے تحفظ کیلئے کوئی کسر اٹھا نہیں رکھیں گے ۔

مزید :

صفحہ اول -