چینی فرم کی پاکستان اسٹیل مل کی خریداری میں دلچسپی
اسلام آباد( صباح نیوز) وفاقی حکومت کی جانب سے عالمی مالیاتی فنڈ(آئی ایم ایف)کے تحفظات پر نجکاری کا عمل بحال کردیا گیا، جس کے ساتھ ہی چینی فرم نے پاکستان اسٹیل ملز کی خریداری میں دلچسپی ظاہر کردی۔میڈیا رپورٹ کے مطابق چین کے بااسٹیل گروپ نے پاکستان اسٹیل کی خریداری میں دلچسپی ظاہرکرتے ہوئے وفاقی حکومت کو اس حوالے سے آگاہ کردیا ہے۔ذرائع کا کہنا ہے کہ اسٹیل مل کی نجکاری کا عمل رواں مالی سال کے دوران ہی مکمل ہونے کی امید ہے۔بااسٹیل گروپ چین کی سب سے بڑی اسٹیل کمپنی ہے، جس کی 19 ذیلی کمپنیاں بھی ہیں، جبکہ کمپنی کی سالانہ پیداوار 34 ملین ٹن ہے۔ذرائع کے مطابق آئی ایم ایف نے اسٹیل مل کی نجکاری کا عمل سست ہونے پر تحفظات کا اظہار کیا تھا، جس کے بعد حکومت نے ترجیحی بنیادوں پر نجکاری کا عمل جون 2017 تک مکمل کرنے کا فیصلہ کیا تھا۔ذرائع نے مزید کہا کہ وفاقی حکومت اسٹیل مل کا مالی خسارہ کم کرنے کی کوشش کر رہی ہے، جبکہ سندھ حکومت نے اب تک اس کی خریداری میں کوئی دلچسپی ظاہر نہیں کی۔
