کیویز اور انگلش سریز، منسوخ ہونے سے پی ٹی وی کو 25کروڑ روپے کا نقصان ہوا، دنیا کو ”ایبسولیوٹلی ناٹ“ کہیں گے تو قیمت ادا کرنی پڑے گی: فواد چودھری

 اسلام آباد(مانیٹرنگ ڈیسک، نیوز ایجنسیاں) وفاقی وزیر اطلاعات فواد چودھری نے کہا کہ نیوزی لینڈ اور انگلنیڈ کی سیریز ملتوی ہونے پر پاکستان ٹیلی ویڑن کو 25 کروڑ روپے کا نقصان ہوا، اگر دنیا کو ’ایبسولیوٹلی ناٹ‘کہیں گے تو پھر قیمت ادا کرنی پڑے گی۔وفاقی کابینہ کے اجلاس کے بعد میڈیا سے گفتگو کرتے ہوئے وفاقی وزیر اطلاعات کا کہنا تھا کہ یہ کہنا غلط ہے کہ کہ پاکستان میں لوگوں کی آمدن نہیں بڑھی، کسانوں کی آمدن میں 1100ارب اضافہ ہوا، مزدورکی آمدن دْگنا ہوچکی ہے، ٹیکسٹائل انڈسٹری میں لیبرنہیں مل رہی،70 فیصد آبادی کی آمدن میں خاطرخواہ اضافہ ہواہے۔ ہم غریب عوام کے لیے سبسڈی لیکرآرہے ہیں۔اپنی بات کو جاری رکھتے ہوئے ان کا کہنا تھا کہ تاجکستان میں پاکستان سے چینی 35 روپے کلومہنگی ہے۔ اس وقت بھی دنیا سے پٹرولیم مصنوعات کی قیمتیں پاکستان میں کم ہے، قطر جیسا ملک گیس میں خود کفیل لیکن پاکستان میں قطر سے بھی گیس کا ریٹ کم ہے۔فواد چودھری نے مزید کہا کہ 6 ماہ،سال میں الیکشن کی پیشگوئیاں کرنے والوں کو مایوسی ہو گی، اپوزیشن میں بونے ہی رہ گئے ہیں کرسیاں نیچے آگئی ہیں، اپوزیشن کی ساری سیاست صرف اپنے پیسے بچانے کے لیے ہورہی ہے۔ ان کی لیڈرشپ کہتی ہے پہلے ہمارے کیسزپربات کریں، اصلاحات کے لیے اپوزیشن کوبلاتے ہیں توآتے نہیں۔وزیر اطلاعات کا کہنا تھا کہ نیوزی لینڈ اور انگلنیڈ کی سیریز ملتوی ہونے پر پاکستان ٹیلی ویڑن کو 25 کروڑ روپے کا نقصان ہوا، اگر آپ ایبسولیوٹلی ناٹ کہیں گے تو پھر قیمت ادا کرنی پڑے گی۔ان کا کہنا تھا کہ یہ نہیں ہوسکتاکہ ہم اوورسیزپاکستانیوں کوووٹنگ کاحق نہ دیں، اوورسیز پاکستانی ملکی معیشت کی ریڑھ کی ہڈی ہیں، انتخابی اصلاحات کو لے کر ہمیں آگے بڑھنا ہے، ای وی ایم کے خلاف وہ بات کرتے ہیں جن کوعقل نہیں، دنیا الیکشن کے حوالے سے ٹیکنالوجی میں بہت آگے چلی گئی ہے، اپوزیشن کوانتخابی اصلاحات پر بیٹھنے کی دعوت دیتے ہیں۔ اگلاالیکشن نئی مردم شماری اورنئی حلقہ بندیوں کے مطابق ہوناہے۔ نئی مردم شماری نے 18ماہ میں مکمل ہونا ہے۔ ساتویں مردم شماری کی منظوری کے مرااحل چل رہے ہیں۔ وفاقی وزیر اطلاعات کا کہنا تھا کہ سینیماز کو بجلی اور ٹیکسز پر ریلیف دے رہے ہیں، سینیماز میں کینیڈین پنجابی فلموں کی اجازت دے رہے ہیں۔ چاہتے ہیں سینیماز کو جلد از جلد کھولا جائے۔ سینیما کو کھولنے کیلئے بھی بات چیت جاری ہے فواد چودھری کا کہنا تھا کہ چاہتے ہیں کراچی، گوادر، مزار شریف سے تاشقند تک ٹرین جائے۔ ہم ٹرانس مزارشریف ٹرین بنانا چاہتے ہیں۔ ازبکستان کو بزنس ویزا لسٹ میں شامل کیا جارہاہے۔ فواد چوہدری نے کہا کہ نیوزی لینڈ اورانگلینڈ کرکٹ بورڈ کے خلاف قانونی کارروائی کیلئے وکلا سے مشورہ کریں گے۔   سماجی رابطے کی ویب سائٹ ٹوئٹر پر اپنے بیان میں  فواد چوہدری نے  کہا کہ نیوزی لینڈ اورانگلینڈ کے دوروں کی منسوخی سے PTV کو کروڑوں روپے کا نقصان ہوا۔ دونوں بورڈزکے خلاف قانونی کارروائی کیلئے وکلا سے مشورہ کریں گے۔ فواد چوہدری نے کہا کہ پاکستان کیخلاف ایک مخصوص بین القوامی لابی مصروف عمل ہے لیکن ہمیں جھکانے کی خواہش رکھنے والے کبھی کامیاب نہیں ہوں گے۔ یہ غلط فہمی جلد دور کر لیں۔
فواد چوہدری