میری رہائی کی بات اللہ ہی بہتر جانتا ہے ،جوحالات ہیں تمام سیاستدانوں کو انتخابات سے قبل حفاظتی ضمانت کرا لینی چاہئے، پرویز الٰہی
اسلام آباد(ڈیلی پاکستان آن لائن)تحریک انصاف کے صدر اور سابق وزیراعلیٰ پرویز الٰہی نے کہاہے کہ جوحالات ہیں تمام سیاستدانوں کو انتخابات سے قبل حفاظتی ضمانت کرا لینی چاہئے ،
نجی ٹی وی چینل جیو نیوز کے مطابق چودھری پرویز الٰہی کو جوڈیشل کمپلیکس توڑ پھوڑ کیس میں انسداد دہشتگردی عدالت پیش کردیا، اس موقع پر صحافیوں سے غیررسمی گفتگو کرتے ہوئے پرویز الٰہی نے کہاکہ بجلی مہنگی ہونے کے اصل ذمہ دار نوازشریف اور شہبازشریف ہیں،آج مہنگائی سے عام آدمی ختم ہو چکا ہے ،ان کا کہناتھا کہ جیل کا کھانا دیا جاتا ہے جس سے طبیعت ناساز رہتی ہے،پہلے ڈاکٹر کی سہولت میسر تھی، اب ان کو اس میں بھی مسائل نظر آنے لگے۔
تحریک انصاف کے صدر نے کہاکہ عام انتخابات نہ ہونے سے ملک کا نظام رکا ہوا ہے،ایک سوال ’’کیا لگتا ہے انتخابات سے قبل آپ رہا ہوجائیں گے‘‘ کے جواب میں انہوں نے کہاکہ میری رہائی کی بات اللہ ہی بہتر جانتا ہے ،جوحالات ہیں تمام سیاستدانوں کو انتخابات سے قبل حفاظتی ضمانت کرا لینی چاہئے ،سابق وزیراعلیٰ پنجاب نے کہاکہ چیئرمین پی ٹی آئی سے بیک ڈور مذاکرات پر کچھ نہیں کہہ سکتا،چودھری شجاعت حسین سے دوبارہ ملاقات ہوئی۔
صحافی کے سوال ’’بلاول بھٹو کا کہناہے کہ شیخ رشید اور پرویز الٰہی اندر رہیں یا باہر کوئی فرق نہیں پڑتا ‘‘ کے جواب میں پرویز الٰہی نے کہاکہ بلاول بھٹو کو اپنی سالگرہ خوشی سے منانے دیں،ایک اور سوال ’’سننے میں آ رہا ہے نوازشریف کی ملک واپسی کی تاریخ بدل رہی ہے‘‘ کے جواب میں انہوں نے کہاکہ نوازشریف تو خود بھی بدل سا گیاہے۔
