بھارت میں کورونا کی صورتحال تشویشناک، اداکارہ شسمیتاسین کو نیکی کرنی مہنگی پڑ گئی، سوشل میڈیا پر تنقید شروع ہو گئی
ممبئی (ویب ڈیسک) سابق مس ورلڈ اور اداکارہ سشمیتا سین ممبئی کے بجائے دہلی میں کورونا کے مریضوں کے لیے آکسیجن سلنڈرز کا انتظام کرنے پر سوشل میڈیا صارفین کے ہاتھوں تنقید کا نشانہ بن گئیں۔
بھارتی میڈیا کے مطابق بھارت کے دارالحکومت نئی دہلی کے شانتی مکند ہسپتال کے سی ای او سنیل ساگر میڈیا کو کورونا کی صورتحال اور ہسپتال میں آکسیجن سلنڈرز کی کمی کے بارے میں بتاتے ہوئے جذبات پرقابو نہ رکھ سکے اور روپڑے۔
بھارتی اداکارہ سشمیتا سین نے یہ ویڈیو ٹوئٹر پر شیئر کرتے ہوئے لکھا یہ بہت افسوسناک ہے۔ آکسیجن کی کمی کا بحران ہر جگہ موجود ہے۔ سشمیتا نے لکھا میں نے دہلی کے اس ہسپتال کے لیے چند آکسیجن سلنڈرز کا انتظام کرلیا ہے لیکن مشکل یہ ہے کہ ان آکسیجن سلنڈرز کو ممبئی سے دہلی بھیجنے کے لیے کوئی راستہ نہیں ہے۔ اداکارہ نے تمام لوگوں سے درخواست کرتے ہوئے کہا کہ یہ سلنڈرز دہلی پہنچانے میں ان کی مدد کریں۔
This is deeply heart breaking...oxygen crisis is everywhere. I have managed to organise a few oxygen cylinders for this hospital but have no way to transport it to Delhi from Mumbai...please help me find a way???? https://t.co/p8RWuVQMrO
— sushmita sen (@thesushmitasen) April 22, 2021
ٹوئٹر پر جہاں لوگوں نے سشمیتا کے اس اقدام کو سراہا وہیں کچھ لوگوں نے ان پر تنقید کی کہ اگر آکسیجن کی کمی کا بحران ہر جگہ موجود ہے تو آپ ان سلنڈرز کو دہلی کیوں بھیج رہی ہیں۔ دہلی بھیجنے کے بجائے آپ ان سلنڈرز کو ممبئی میں کسی نزدیکی ہسپتال میں بھی بھیج سکتی ہیں۔
سشمیتا سین نے اس شخص کو جواب دیتے ہوئے کہا ممبئی میں ابھی بھی آکسیجن سلنڈرز موجود ہیں اور اسی وجہ سے میں ان سلنڈرز کا انتظام کرنے میں کامیاب ہوئی ہوں۔ لیکن دہلی میں آکسیجن سلنڈرز کی کمی ہے اور وہاں ان کی زیادہ ضرورت ہے۔ خاص کر چھوٹے ہسپتالوں میں لہذا اگر آپ بھی مدد کرسکتے ہیں تو کریں۔
If Oxygen Crisis is everywhere why are you sending it to Delhi instead of giving it to some similar hospital in Mumbai.
— Hemant (@HemantVIIII) April 22, 2021
واضح رہے کہ بھارت میں کورونا کی صورتحال انتہائی خطرناک ہوچکی ہے۔ بھارت میں 24 گھنٹوں کے دوران کورونا کے 3 لاکھ 32 ہزار 730 مثبت کیسز رپورٹ ہوئے ہیں۔ بھارتی وزارت صحت کی جانب سے جاری کردہ اعداد و شمار کے مطابق مریضوں کی یہ تعداد عالمی سطح پر یومیہ متاثرین کی ریکارڈ تعداد ہے۔ جب کہ ایک دن میں 2 ہزار 263 مریض کورونا کے باعث جان سے ہاتھ دھو بیٹھے ہیں۔
