شبلی فراز نے ن لیگ کی جانب سے مانگے جانے والے مبینہ این آر او کی ’ دستاویزات ٹویٹر پر شیئر کر دیں ،اس میں کیا مطالبہ کیا گیاہے ؟ تہلکہ خیز خبرآ گئی
اسلام آباد (ڈیلی پاکستان آن لائن )وفاقی وزیر اطلاعات شبلی فراز نے نیا پنڈرا باکس کھولتے ہوئے ن لیگ کی جانب سے مانگے جانے والے مبینہ این آر او کے دستاویزات سوشل میڈیا پر شیئر کر دیئے ہیں جس نے ایک نئی بحث چھیڑ دی ہے ۔
ڈان نیوز کی رپورٹ کے مطابق ٹوئٹر پر جاری پیغام میں شبلی فراز نے احتساب آرڈیننس 1999 میں ترمیم کے لیے پیپلز پارٹی اور مسلم لیگ (ن) کی مجوزہ ترامیم کے صفحات شیئر کیے۔اس کے ساتھ انہوں نے لکھا کہ ’کئی دنوں سے مسلم لیگ نواز لمیٹڈ مطالبہ کررہی تھی کہ این آر او کس نے مانگا توحضور والا یہ ہیں وہ ذرائع اور دستاویزات جن کی وساطت سے این آر او مانگا گیا۔وزیر اطلاعات کا کہنا تھا کہ تاریخ گواہ ہے کہ ہر مرتبہ مسلم لیگ (ن) کی قیادت نے ملک اور قانون سے فرار کا راستہ اختیار کیا ہے۔
شبلی فراز کی جانب سے ٹویٹر پر شیئر کی گئی دستاویزات اس میں کہا گیاہے کہ تحقیقات کا حکم دینے کے بعد یا انکوائری کے وقت، ٹرائل شروع ہونے سے پہلے یا بعد میں یا اپیل کے زیر التوا ہونے کے دوران سرکاری عہدہ رکھنے والا یا کوئی بھی دوسرا شخص کسی جرم کے نتیجے میں بنائے گئے اثاثے یا حاصل کیے گئے فوائد واپس کرنے کی پیش کش کرے تو اس آرڈیننس کے تحت چیئرمین نیب، کیس کے حقائق اور پہلوو¿ں پر غور کر کے اپنی صوابدید اور جو شرائط و ضوابط وہ ضروری سمجھیں انہیں مدِ نظر رکھتے ہوئے اس قسم کی پیشکش کو قبول کرسکتے ہیں۔
دستاویز کے مطابق اگر سرکاری عہدہ رکھنے والا کوئی بھی دوسرا شخص چیئرمین نیب کی متعین کردہ رقم واپس کرنے پر راضی ہو تو اس کیس کو سرکاری عہدہ رکھنے والے یا کسی بھی شخص یا شریک ملزم کی رہائی سے متعلق کیس کو منظوری کے لیے عدالت یا اپیلیٹ کورٹ میں بھیجا جائے گا۔دستاویز میں لکھا گیا کہ اگر چیئرمین نیب اس قسم کی پیشکش سے انکار کردیں تو سرکارہ عہدیدار یا کوئی بھی شخص اس پیشکش پر غور یا منظوری کے لیے براہ راست عدالت سے رجوع کرسکتا ہے۔
شبلی فراز کی شیئر کردہ مجوزہ ترامیم کے مطابق نیب جرم کے ارتکاب یا رقوم کی منتقلی کو 5 سال کا عرصہ گزرنے کے بعد مبینہ جرم کی تحقیقات، تفتیش یا ریفرنس دائر نہیں کرے گا۔دستاویز میں یہ درج تھا کہ قومی احتساب بیورو (نیب) مندرجہ ذیل صورتحال میں الزامات پر کوئی ایکشن نہیں لے گا:
i) ایسی شکایت جو نامعلوم یا فرضی نام سے کی گئی ہو۔
ii) جس میں عوام کا پیسہ شامل نہ ہو۔
iii) جس میں شامل رقم ایک ارب روپے سے کم ہو۔
واضح رہے کہ وزیراعظم عمران خان اور حکومتی اراکین اکثر اپوزیشن پر این آر او مانگنے کا الزام عائد کرتے رہتے ہیں جبکہ وزیراعظم اکثر و بیشتر اپنی تقاریر میں بھی یہ بات دہراتے ہیں کہ چاہے کچھ ہوجائے وہ اپوزیشن کو این آر او نہیں دیں گے۔
کئی دنوں سے مسلم لیگ نواز لمیٹڈ ڈیمانڈ کر رھی تھی کہ NRO کس نے مانگا۔ حضور والا یہ ھیں وہ ذرائع اور دستاویزات جن کی وساطت سے NRO مانگا گیا ۔ تاریخ گواہ ھے کہ ھر بار PMLNکی قیادت نے ملک اور قانون سے فرار کا راستہ اختیار کیا ھے pic.twitter.com/EwDxNzezgG
— Senator Shibli Faraz (@shiblifaraz) August 23, 2020