پتنگ بازی، پتنگ سازی اور ٹرانسپورٹ کرنا ناقابل ضمانت جرم قرار

                                                                        لاہو ر(این این آئی) محکمہ داخلہ پنجاب نے پتنگ بازوں کے گرد شکنجہ سخت کر دیا،پتنگ بازی، پتنگ سازی اور ٹرانسپورٹ کرنا ناقابل ضمانت جرم قرار دے دیا گیا،پتنگ کے ساتھ ساتھ دھاتی ڈور، تار، تندی اور مانجھا لگی ڈور کی تیاری، استعمال اور ٹرانسپورٹیشن بھی جرم قرار دیئے گئے۔ترجمان محکمہ داخلہ پنجاب نے بتایا کہ پنجاب کابینہ نے پتنگ بازی پر پابندی کے ایکٹ 2007میں اہم ترامیم منظور کر لیں جن کے مطابق پتنگ اڑانے والے کو 3سے 5سال قید یا 20لاکھ جرمانہ یا دونوں ہوں گے، پتنگ اڑانے والے کو جرمانے کی عدم ادائیگی پر مزید 1سال قید کی سزا ہوگی، پتنگ ساز اور ٹرانسپورٹر کو 5سے 7سال قید یا 50لاکھ جرمانہ یا دونوں ہوں گے۔اس کے علاوہ پتنگ بنانے والے اور ٹرانسپورٹر کو جرمانے کی عدم ادائیگی پر مزید 2سال قید کی سزا ہوگی، پتنگ بنانا اور اس کی ٹرانسپورٹیشن بھی ناقابل ضمانت جرم قرار دیئے گئے۔ترجمان محکمہ داخلہ نے کہا کہ پتنگ باز بچے کو پہلی بار وارننگ، دوسری بار پکڑے جانے پر 50ہزار جرمانہ ہوگا، تیسری دفعہ خلاف ورزی پر 1لاکھ جرمانہ ہوگا، پتنگ باز بچہ جرمانہ ادا نہ کر سکے تو اس کے والدین یا سرپرست سے وصول کیا جائے گا، چوتھی خلاف ورزی پر بچے کو جوینائل جسٹس سسٹم ایکٹ 2018 کے تحت سزا اور جیل جانا پڑے گا۔ترجمان محکمہ داخلہ نے کہا کہ انسانی جانوں کے تحفظ کیلئے خونی کھیل کی روک تھام کے اقدامات ضروری ہیں، سزاں اور جرمانے میں کئی گنا اضافہ خونی کھیل کی حوصلہ شکنی کرے گا۔

پتنگ بازی