پی ٹی آئی کی دھرنے اورکنٹینرکی سیاست دوبارہ سرگرم، شازیہ مری

اسلام آباد(مانیٹرنگ ڈیسک) ترجمان پیپلز پارٹی شازیہ مری نے کہا ہے پی ٹی آئی کی دھرنے اورکنٹینر کی سیاست ایک مرتبہ پھر سرگرم ہے۔اسلام آباد میں ترجمان پیپلز پارٹی شا ز یہ مری کا اپنے ایک بیان میں کہنا تھا خدارا! اس ملک پر اور یہاں کے عوام پر اب رحم کرو، آج پھر ایک گھمنڈی کے ایما پر لوگوں کو پریشان کیا گیا، پی ٹی آئی کارکنوں کی جانب سے چھو ٹی چھوٹی ٹولیوں کی صورت میں نکل کررستے بند کرکے بلاوجہ لوگوں کو تنگ کیا جارہا ہے۔ پی ٹی آئی اندرونی ٹوٹ پھوٹ کا شکار ہے، ان کو خود سمجھ نہیں آرہا کرنا کیا ہے، بانی پی ٹی آئی کی یوٹرن کی سیاست سے ان کے اپنے کارکنان بھی تنگ آگئے ہیں، ملک اس وقت افراتفری اور انتشار کا متحمل نہیں ہوسکتا، پی ٹی آئی کو مشورہ ہے سیاست کریں تماشہ نہیں، اب کوئی ایمپائر نہیں جو فرمائش پوری کرنے آئیگا، لہٰذا سدھر جائیں، ہم سب کی پہلی ترجیح پاکستان ہونی چاہیے اپنی ذات بعد میں آتی ہے، یہاں الٹی ہی کہانی ہے، دعا ہی کرسکتے ہیں اللہ کریم ایسے لوگوں کو عقل اور سوچنے سمجھنے کی ہدایت دے۔

شازیہ مری