آج اور کل ملک کے بیشتر علاقوں میں موسلادھار بارشوں کی پیشگوئی

اسلام آباد، لاہور(این این آئی)محکمہ موسمیات نے آج اور کل ملک کے بیشتر علاقوں میں موسلادھار بارشوں کی پیشگوئی کر دی، این ڈی ایم اے نے سیلابی صورتحال کے پیش نظر ہائی الرٹ جاری کردیا۔محکمہ موسمیات کی جانب سے 23اور 24 اگست کے دوران خیبرپختونخوا اور پنجاب کے مختلف علاقوں میں مزید بارشوں کی پیشگوئی کی گئی ہے، اس حوالے سے این ڈی ایم اے نے موسلا دھاربارشوں کے باعث مقامی ندی نالوں میں پانی کا بہاؤ بڑھنے کیساتھ دریائے کابل کے بہاؤ میں بھی اضافے کا امکان ظاہر کیا ہے، خیبرپختونخوا کے مختلف اضلاع ایبٹ آباد، پاراچنار، چارباغ، چارسدہ، چترال، دیر، ہری پور، ہزارہ، مالاکنڈ، مانسہرہ، مردان، پشاور اور صوابی میں سیلابی صورتحال متوقع ہے، تمام متعلقہ اداروں کو الرٹ رہنے،ممکنہ ہنگامی صورتحال پر فو ر ی رسپانس کو یقینی بنانے کی ہدایات جاری کردی گئی ہیں۔مسافراور سیاحوں کو لینڈ سلائیڈنگ کے خطرے کے پیش نظر پہاڑی علاقوں کے سفر سے گریز کرنے کی ہدایت کی گئی ہے۔دوسری جانب پی ڈی ایم اے کا کہنا ہے آئندہ 24 گھنٹوں میں پنجاب کے بیشتر اضلاع میں بارشوں کا امکان ہے،دریائے سندھ میں نچلے درجے کی سیلا بی صورتحال برقرار ہے، دریائے چناب راوی جہلم اور ستلج میں پانی کا بہاؤ نارمل لیول پر ہے، رود کوہیوں میں سیلابی صورتحال کے پیش نظرنتظامیہ الرٹ ہیں۔

بارش پیشگوئی