مذہبی جماعتوں کا احتجاج، جڑواں شہروں کے راستے، سکول بند، ریڈزون سیل
راولپنڈی، اسلام آباد(مانیٹر نگ ڈیسک) مبارک ثانی کیس کے فیصلے کے خلاف سپریم کورٹ کے سامنے مذہبی جماعتوں کے احتجاج کے اپیل کی وجہ سے جڑواں شہروں کے راستے بند کرکے ریڈزون کو سیل کردیا گیا اور اسکولوں میں چھٹی دی گئی۔رات گئے سے موٹر وے سمیت جڑواں شہروں کے راستے بند کرکے سکولوں میں چھٹی کا اعلان کیا گیا، جب کہ مذہبی جماعتوں کے احتجاج کے باعث پی ٹی آئی نے بھی جلسہ ملتوی کرنے کا اعلان کیاہے۔ا نجی ٹی وی کے مطابق ضلعی انتظامیہ نے گزشتہ روزہی تحریک انصاف کے ترنول جلسے کے حوالے سے اجازت نامہ اچانک منسوخ کردیا تھا، جس کے بعد پی ٹی آئی کی جانب سے ہر صورت جلسہ منعقد کرنے کا اعلان کیا گیا تھا۔گزشتہ رات ہی سے موٹر وے سمیت اسلام آباد اور راولپنڈی کی جانب جانے والے تمام راستے کنٹینر اور دوسری رکاوٹیں کھڑی کرکے بند کردیے گئے تھے جب کہ سکولوں کے لیے بھی تعطیل کا اعلان کیا گیا تھا۔راستے بند ہونے سے علی الصبح ہی سے شہریوں کو پریشانی کا سامنا رہا جب کہ کئی مقامات پر راستہ نہ ملنے کے سبب گاڑیوں کی طویل قطاریں لگ گئیں۔واضح رہے کہ راولپنڈی انتظامیہ کا مؤقف تھا کہ راولپنڈی میں پاک بنگلا ٹیسٹ سیریز کی وجہ سے مہمان ٹیم موجود ہے، سکیورٹی خدشات کے پیش نظر جلسے کی اجازت نہیں دی جا سکتی۔ علاوہ ازیں پنجاب حکومت نے بھی گزشتہ روز صوبے بھر میں دفعہ 144 نافذ کردی تھی، جس کے تحت جلسوں، ریلیوں اور دھرنوں پر پابندی عائد کردی گئی تھی۔ اس تین روزہ پابندی کا اطلاق آج 22 اگست سے شروع ہوگیا۔اسلام آباد انتظامیہ کی جانب سے جلسے اور سیاسی قافلوں کے پیش نظر ریڈ زون کو سیل کردیا گیا ہے۔دوسری جانب ترجمان ایجوکیشن بورڈ کے مطابق میٹرک ضمنی امتحانات کے جاری پرچے معمول مطابق ہوں گے۔ علاوہ ازیں میٹرو سروس بھی معطل رہی اور بس اسٹیشنز کی سکیورٹی میں اضافہ کیا گیا۔ جی ٹی روڈ پر سواں کے قریب بھی کنٹینرز کھڑے کرکے شاہراہ کو دونوں جانب سے بلاک کردیا گیا ہے۔ اسی طرح سیکستھ روڈ پر بھی رکاوٹیں کھڑی کردی گئی ہیں اور فیض آباد کی جانب کسی کو آنے کی اجازت نہیں دی جا رہی۔ٹی چوک روات کے قریب بھی شاہراہ بند ہے۔ فیض آباد سے اسلام آباد کی انڑی بھی بند رہی۔ کیرج فیکٹری کے مقام پر بھی شاہراہ کو بند کیاگیا۔ قومی شاہراہ روات چک بیلی موڑ مندرہ و دیگر مقامات پر سے بلاک کی گئی۔ سرکاری و تعلیمی اداروں کی گاڑیاں روڈ بلاک ہونے کے سبب واپس جا رہی ہیں۔
جڑواں شہرسیل
