اٹک، سکول وین پر فائرنگ سے 2بچے جاں بحق، ڈرائیور سمیت 6زخمی
راولپنڈی (مانیٹرنگ ڈیسک) ماڈل پولیس اسٹیشن صدر اٹک کی حدود میں کالا چٹا پہاڑ کے دامن میں واقع گاؤں ڈھیری کوٹ میں نامعلوم افراد نے سکول وین پر فائرنگ کر دی جس کے باعث 2 بچے جاں بحق ہوگئے۔ترجمان ریسکیو کے مطابق فائرنگ سے 5 بچے اور وین کا ڈرائیور بھی زخمی ہوا، زخمیوں اور لاشوں کو ڈسٹرکٹ ہیڈ کوارٹر ہسپتال اٹک منتقل کر دیا ہے۔پولیس کے مطابق تمام بچوں کی عمریں 10 سے 12 سال کے درمیان ہیں، نامعلوم افراد موقع سے فرار ہونے میں کامیاب ہوگئے۔آئی جی پنجاب ڈاکٹر عثمان انور نے واقعے کا نوٹس لیتے ہوئے ڈی پی او اٹک کو موقع پر پہنچنے کی ہدایت کی۔ ڈی پی او اٹک نے تمام علاقوں کی ناکہ بندی کر کے سرچ آپریشن شروع کروا دیا۔ڈی پی او اٹک سردار غیاث گل نے کہا ہے کہ ابتدائی رپورٹ کے مطابق ملز موں نے ذاتی دشمنی کی بنا پر وین ڈرائیور پر حملہ کیا جس کی زد میں آکر دو طالبات جاں بحق ڈرائیور سمیت 6 طالب علم زخمی ہوئے۔
سکول وین پر فائرنگ
