”چین میں ایغور مسلمانوں کے ساتھ ہونے والے ناروا سلوک پر آواز اٹھائیں“ شاہد آفریدی میدان میں آگئے، وزیراعظم سے اپیل کردی
کراچی (ویب ڈیسک) قومی کرکٹ ٹیم کے سابق کپتان شاہد آفریدی نے وزیراعظم عمران خان سے اپیل کی ہے کہ وہ چین میں ایغور مسلمانوں کے ساتھ ہونے والے ناروا سلوک پر آواز اٹھائیں۔ چین کے سنکیانگ ریجن میں ایک کروڑ سے زائد ایغور مسلمان آباد ہیں جنہیں مبینہ طور پر حراستی مراکز میں رکھا جارہا ہے۔یہی وجہ ہے کہ امریکا نے ایغور اور دیگر مسلم اقلیتوں کے ساتھ ناروا سلوک کے باعث چین کی 28 سرکاری تنظیموں اور کمپنیوں پر پابندیاں عائد کردی تھیں۔
امریکا کا کہنا تھا کہ چین میں مسلم اقلیت پر ظالمانہ جبر کو برداشت نہیں کرے گا۔اس کے علاوہ انسانی حقوق کی عالمی تنظیمیں بھی چین میں مسلم اقلیت پر ہونے والے تشدد کے خلاف آواز اٹھاتے رہے ہیں۔گزشتہ ماہ ایک امریکی ٹک ٹاک اسٹار فیروزہ عزیز نے چین کے مسلمانوں کی حالتِ زار سے متعلق آگاہی فراہم کرنے کی ویڈیو بنائی تھی جو خوب وائرل ہوئی تھی تاہم اب قومی کرکٹ ٹیم کے سابق کپتان شاہد آفریدی نے بھی چین میں مسلم اقلیتوں کے حقوق اور ان کے تحفظ کے لیے آواز بلند کی ہے۔
Hearing of atrocities committed against the #UighurMuslims is heartbreaking. I request @ImranKhanPTI to speak up against this; talk of uniting the Muslim ummah includes our brothers & sisters in China too. @CathayPak is requested to address the humane & just treatment of Muslims https://t.co/0D6MNZWztV
— Shahid Afridi (@SAfridiOfficial) December 22, 2019
شاہد آفریدی نے اپنی ٹوئٹ میں چین کے مسلمانوں کی حالت زار پر افسوس کا اظہار کیا اور وزیراعظم عمران خان سے اپیل کرتے ہوئے کہا کہ چین میں مسلمانوں پر ہونے والے مظالم کے خلاف آواز اٹھائیں، مسلم امہ کو متحد کرنے کی بات ہوتی ہے تو چین کے مسلمان بہن بھائی بھی اس میں شامل ہیں۔انہوں نے اپنی ٹوئٹ میں پاکستان میں چینی سفارتخانے کو بھی ٹیگ کیا اور اپیل کی کہ چین میں مسلمانوں کے ساتھ ناروا سلوک بند کیا جائے۔
واضح رہے کہ چین میں ایغور مسلمانوں کے ساتھ ناروا سلوک پر سوشل میڈیا پر متعدد صارفین غم و غصے کا اظہار کر رہے ہیں اور اِس وقت ٹوئٹر کے ٹاپ ٹرینڈز میں چائنا کلنگ مسلم کا ہیش ٹیگ سرفہرست ہے۔