حافظ سعید کی نظر بندی پاکستان کا جعلی اقدام ہے، راج ناتھ سنگھ
نئی دہلی(مانیٹرنگ ڈیسک)بھارتی وزیر داخلہ راج ناتھ سنگھ اتر پردیش میں انتخابات میں کامیابی کیلئے پاکستان دشمنی میں چند قدم آگے نکل گئے،ایک بار پھر سرجیکل سٹرائیک پر ہٹ دھرمی کا مظاہرہ کرتے ہوئے اپنی کامیابی قراردیا ہے،حافظ محمد سعید کی نظر بندی جعلی اقدام ہے اس سے بڑھ کر کچھ کرنے کی ضرورت ہے۔ خبر رساں ادارے’’ڈی این اے‘‘کو انٹرویو دیتے ہوئے کہا ہے کہ پاکستان کیخلاف سرجیکل سٹرائیک نے بہت حد تک معاملات کو تبدیل کردیا ہے،آرمی کا مورال بلند ہوا ہے،دہشتگردوں کو روزانہ کی بنیاد پر نشانہ بنایا جارہا ہے،یہ ہمارے لیے بہت اچھا ثابت ہوا ہے۔ایک سوال کے جواب میں انہوں نے کہا ہے کہ بھارتی قوم میں فخر احساس پایا جاتا ہے اس لیے ہم اپنے انتخابی جلوسوں میں ’’سرجیکل سٹرائیک‘‘کا ذکر نہیں کرتے۔انہوں نے کہا ہے پاکستان ہمارا ہمسایہ ملک ہے ہم نے اس کے وزیر اعظم کو حلف برداری کی تقریب میں بلایا تھا،اسلام آباد میں سارک کانفرنس کے دوران سوچی سمجھی سازش کے تحت ہمارے خلاف شو ر مچایا گیا۔ایک سوال کے جواب میں کہا ہے کہ پاکستان کو دہشتگرد ریاست قرار دلوانے میں جلدبازی نہیں کرنا چاہتے،ہم ایک بین الاقوامی گاؤں کی شکل اختیار کرچکے ہیں،ہم چاہتے ہیں دوسرے ممالک ہم ساتھ تعاون کریں۔حافظ سعید کے بارے میں پوچھے گئے سوال کے جواب میں انہوں نے کہا ہے کہ پاکستانی وزیر دفاع نے اس بارے میں بول دیا ہے یہ ایک اچھا اشارہ ہے لیکن فیصلہ کن قدم اٹھانے کی ضرورت ہے،نظر بندی سے کام نہیں چلے گا،میرے کہنے کا مطلب ہے کہ مزید اقدامات کرنے کی ضرورت ہے،قانون اپنا کام کرے یہ بھی ضروری ہے ،نظر بندی ایک جعلی اقدام ہے ،اس معاملے میں ہم آنکھیں بند کرکے دھوکہ نہیں کھا سکتے۔
