پاکستان امریکہ کے ساتھ اعلیٰ سطحی تجارتی مذاکرات میں پیش رفت کا خواہاں ہے ، نوید قمر 

 واشنگٹن (این این آئی)وزیر تجارت سید نوید قمر نے کہا ہے کہ پاکستان امریکی تجارتی حکام سے اعلیٰ سطحی اجلاس کے دوران زراعت اور انفارمیشن ٹیکنالوجی میں پیش رفت کا خواہاں ہے۔غیرملکی میڈیاکے مطابق وزیر تجارت سید نوید قمر نے کہا کہ سات برسوں میں بین الاحکومتی تجارت اور سرمایہ کاری حکام کے پہلے وزارتی سطح پر ہونے والے اجلاس میں پاکستان زراعت اور انفارمیشن ٹیکنالوجی میں پیش رفت کا خواہاں ہے۔وزیر تجارت سید نوید قمر آج پاک امریکہ ٹریڈ اینڈ انوسٹمنٹ فریم ورک ایگری منٹ کے تحت امریکی تجارتی نمائندے کیتھرین تائی اور دیگر سینئر امریکی حکام سے ملاقات کریں گے۔رپورٹ کے مطابق وزیر تجارت نے کہا کہ یہ ملاقات دونوں ممالک کے درمیان تعلقات کو مزید مضبوط بنائے گی جو کہ حالیہ برسوں سیاسی معاملات کی وجہ سے تناﺅ کا شکار ہیں، پاکستانی سفارت خانے کا کہنا ہے کہ گڈز اینڈ سروسز کی تجارت 12 ارب ڈالر تک ہے ،انہوں نے کہا کہ پاکستان، امریکا کو آم کی برآمدات بڑھانے اور انفارمیشن ٹیکنالوجی سمیت کمپیوٹر پروگرامنگ سروسز میں ہموار، بڑھتی ہوئی تجارت کو یقینی بنانے کا سوچ رہا ہے جبکہ امریکا کی طرف سے گائے کا گوشت اور سویابین کی برآمدات بڑھانے کا سوچا جارہا ہے، پاکستان کو آئی ٹی اور فارماسیوٹیکلز پر خصوصی توجہ کیلئے امریکی سرمایہ کاری کو راغب کرنے کی بھی توقع ہے، ہم چاہتے ہیں کہ یہ کھلا مسابقتی ماحول ہو۔انہوں نے کہا کہ پاکستان کو امریکی سپلائی چینز کو بڑھانے میں مدد کرنے کے لیے اچھی جگہ دی گئی تھی جو کورونا وائرس سے پہلے چین پر انحصار کرتی تھیں لیکن پاکستان نے دوسرے علاقائی سپلائرز کا رخ کرنا شروع کر دیا ہے جو کہ وسطی ایشیا کے لیے گیٹ وے کا کام کر سکتا ہے۔
 نوید قمر