آٹا ، گھی نایاب ، حکومت نیب افسروں کی تبدیلیوں میں لگی ہوئی ہے : شیخ رشید 

راولپنڈی (آئی این پی ) سربراہ عوامی مسلم لیگ و سابق وفاقی وزیر داخلہ شیخ رشید احمد نے کہا کہ چیئرمین نیب کا استعفی 85 رکنی کابینہ کے منہ پر طمانچہ ہے، استعفی دینے کی دیر تھی کہ نیب کے طلبی نوٹس کا جمعہ بازار لگ گیا ہے۔ سماجی رابطے کی ویب سائٹ ٹوئٹر پر اپنے پیغام میں شیخ رشید احمد نے کہا کہ صدر مملکت نے الیکشن کی تاریخ دے کر حکومت کی بنیادیں ہلا دی ہیں، لطیف کھوسہ اور سلمان راجہ بھی کہتے ہیں کہ صدر کا فیصلہ آئینی ہے، امید ہے عدلیہ صدر کے فیصلے کو آئینی اور قانونی قرار دے گی۔ شیخ رشید نے کہا پاکستان آئی ایم ایف کا پانچواں اور ایشیا کا پہلا مقروض ترین ملک ہے، 75 سالوں میں تمام وزرائے خارجہ نے جتنے دورے کیے بلاول نے اکیلے کیے ہیں، بلاول بھٹو زرداری موج میلے منا رہے ہیں، وزیر پٹرولیم آذربائیجان میں ادھار تیل اور ایل این جی کے لیے دھکے کھارہے ہیں، آٹا، گھی نایاب اور حکومت نیب افسروں کی تبدیلیوں میں لگی ہوئی ہے۔ سربراہ عوامی مسلم لیگ کا مزید کہنا تھا جیل بھرو تحریک کا آغاز ہو چکاہے، مری میں تاریخ پر بھی پیش ہوں گا اور میڈیا ٹاک بھی کروں گا۔

شیخ رشید