ملٹی نیشنل کمپنی کے دفتر پر چھاپہ ، 40غیر رجسٹرڈ سٹنٹس برآمد ، ملک بھر میں جانچ پڑتال کا عمل شروع

ملٹی نیشنل کمپنی کے دفتر پر چھاپہ ، 40غیر رجسٹرڈ سٹنٹس برآمد ، ملک بھر میں ...

لاہور(آئی این پی) ڈرگ ریگولیٹری اتھارٹی نے لاہور میں ملٹی نیشنل کمپنی سے 40غیررجسٹرڈ اسٹنٹس برآمد کر کے دفتر سیل کر دیا جبکہ سرکاری و نجی ہسپتالوں میں غیر رجسٹرڈ سٹنٹس کے مبینہ استعمال سے متعلق حقائق کی تحقیقات کیلئے تین رکنی کمیٹی تشکیل دیدی ۔تفصیلات کے مطابق ڈرگ ریگولیٹری اتھارٹی کے ہنگامی اجلاس میں ڈاکٹروں کی طرف سے سرکاری اورنجی ہسپتالوں میں غیر رجسٹرڈسٹنٹس کے استعمال کے معاملے پر غور کیاگیا۔اتھارٹی نے دل کے امراض کے کنسلٹنٹ اورماہر ڈاکٹروں کی بددیانتی پر گہری تشویش ظاہر کی جو غیررجسٹرڈ اور غیر معیاری سٹنٹس استعمال کررہے ہیں۔اس حوالے سے حقائق جاننے کے لئے ڈائریکٹر کوالٹی ، ڈائریکٹر میڈیکل ڈیوائسز اور ڈپٹی ڈی جی پر مشتمل کمیٹی تشکیل دی گئی جو اس حوالے سے مفصل رپورٹ مرتب کر یگی۔مزید بتایا گیا ہے کہ ڈرگ ریگولیٹری اتھارٹی کی ٹیم نے غیر رجسٹرڈ سٹنٹس کی فروخت میں ملوث افراد کے خلاف سخت کارروائی کیلئے ملک بھر میں جانچ پڑتال کاعمل شروع کردیا ہے اور چھاپے بھی مارے جارہے ہیں۔گزشتہ روز ایک کارروائی کے دوران ملٹی نیشنل کمپنی کے دفتر پر چھاپہ مار کر 40 غیررجسٹرڈ اسٹنٹ برآمد کر کے دفتر کو سیل کردیا گیا ۔اتھارٹی کے ترجمان کا کہنا ہے کہ غیر رجسٹرڈ اسٹنٹس کی فروخت اور استعمال جرم ہے، ڈاکٹر صرف ڈریپ کے رجسٹرڈ کردہ سٹنٹس استعمال کرنے کے پابند ہیں ۔غیررجسٹرڈ اسٹنٹس کا گھناؤنا کاروبار کرنے والوں کے خلاف ڈریپ ایکٹ کے تحت مقدمات درج ہوں گے ۔

چھاپہ

مزید : علاقائی