”آٹے کے بعد اب یہ چیز بھی میرے گھر بھجوائی جائے “ن لیگی رہنما عظمیٰ بخاری نے آٹے کے ٹرک کے بعد ایک اور مطالبہ کر دیا
لاہور(ڈیلی پاکستان آن لائن ) مسلم لیگ ن کی رہنما اور رکن پنجاب اسمبلی عظمیٰ بخاری نے حکومت کی جانب سے آٹا گھر بھیجنے پر وزیراعلیٰ پنجاب سے استعفیٰ بھی گھر بھیجنے کا مطالبہ کردیا ہے ۔
تفصیلات کے مطابق مسلم لیگ ن کے رہنما ملک احمد خان اور عظمیٰ بخاری نے لاہور میں میڈیا سے گفتگو کی جس دوران محکمہ خوراک کی جانب سے آٹے کا ٹرک گھر بھیجنے پر عظمیٰ بخاری نے کہا کہ گھروں تک آنے کی روایت تحریک انصاف نے قائم کی ہے اب ہم گھروں تک پہنچے تو ان کی چیخیں نکلیں گی۔انہوں نے وزیراعلیٰ پنجاب عثمان بزدار استعفے کا مطالبہ کرتے ہوئے کہا کہ آٹے کے بحران پر وزیر اعلیٰ پنجاب استعفیٰ دے دیں اور پھر وہ بھی میرے گھر بھجوادیا جائے۔لیگی رہنما نے الزام لگایا کہ ان کے گھر گندم جہانگیر ترین کے کہنے پر بھجوائی گئی۔
عظمیٰ بخاری نے مزید کہا کہ حکومت میں موجود چینی مافیاکو بحران پر قابو پانے کی ذمے داری دی گئی ہے مگر ہم چینی، آٹے بحران پر کمیٹی میں پارلیمانی کمیشن بنانے کا مطالبہ کریں گے۔دوسری جانب ملک احمد خان کا کہنا تھا کہ ملک بھر میں آٹے کا نہ ملنا بہت بڑی اسکیم ہے اور اس پر عظمیٰ بخاری کے گھر پر آٹے کا ٹرک بھیجنا حکومتی سنجیدگی کو ظاہر کرتا ہے۔انہوں نے چینی اور آٹے کے بحران پر سخت تشویش کا اظہار کرتے ہوئے کہا کہ اس بحران میں حکومتی نمائندوں کے اپنے مفادات ہیں۔
یاد رہے کہ گزشتہ روز چیئرمین فوڈاتھارٹی پنجاب نے عظمیٰ بخاری سے ایک پروگرام میں تکرار کے بعد آٹے کا پورا ٹرک ان کے گھر کے باہر بھجوا دیا تھا جس کے بعد یہ معاملہ میڈیا پر آیا جبکہ عظمیٰ بخاری اور چیئرمین فوڈ اتھارٹی پنجاب کے درمیان نجی ٹی وی پر اچھی خاصی تکرار بھی ہوئی تھی ۔
