موروثی سیاست کیخلاف ہیں،علی ترین نے بھی الیکشن لڑنے سے انکار کردیا، جہانگیر ترین

موروثی سیاست کیخلاف ہیں،علی ترین نے بھی الیکشن لڑنے سے انکار کردیا، جہانگیر ...
موروثی سیاست کیخلاف ہیں،علی ترین نے بھی الیکشن لڑنے سے انکار کردیا، جہانگیر ترین

روزنامہ پاکستان کی اینڈرائیڈ موبائل ایپ ڈاؤن لوڈ کرنے کے لیے یہاں کلک کریں۔

لودھراں(ڈیلی پاکستان آن لائن) پاکستان تحریک انصاف کے رہنما جہانگیر ترین نے کہا ہے کہ ہم موروثی سیاست کیخلاف ہیں، اس لئے بیٹے نے بھی الیکشن لڑنے سے انکار کر دیا، پارٹی میں موجود دیگر لوگوں کو بھی چاہیے موروثی سیاست نہ کریں،ان کا کہناتھا کہ پارٹی کے سینئر رہنماؤں کو میڈیا پر اختلافی باتیں نہیں کرنی چاہئیں۔

لودھراں میں میڈیا سے گفتگو کرتے ہوئے تحریک انصاف کے رہنما جہانگیر ترین نے کہا کہ نئے پاکستان کیلئے عمران خان کو وزیراعظم بنانا ہے جن کی قیادت میں پنجاب اور وفاق میں حکومت بنائیں گے، نوے فیصد ٹکٹس پرامن طور پر جاری کردیے گئے ہیں اور باقی 10 فیصد بھی دیے جارہے ہیں، ہم پر ٹکٹوں کے حوالے سے بہت دباو¿ ہے، سب سے زیادہ لوگوں کی خواہش ہے کہ تحریک انصاف کے ٹکٹ ملے، ایسے لوگوں کو ٹکٹ دیئے جارہے ہیں جو جیت سکتے ہیں، ٹکٹ ملنے والوں کی فہرست آج یا کل جاری ہوجائے گی۔

پی ٹی آئی کے وائس چیرمین شاہ محمود قریشی کے ساتھ ہونے والی لفظی گولہ باری پر جہانگیر ترین نے کہا کہ کل شاہ محمود نے جو باتیں کیں انہیں نہیں کرنی چاہئیں تھیں، پارٹی کے سینئر رہنماو¿ں کے درمیان ایسی باتیں نہیں ہونی چاہئیں بلکہ اپنے فیصلے بند کمروں میں بیٹھ کر کرنے چاہئیں، میڈیا پر کسی کی ذات کو نشانہ بنانا غیرمناسب ہے، میں نے شاہ محمود قریشی کے جواب میں پریس کانفرنس نہیں کی، کل اہم شخصیات کی حمایت کے موقع پر سوال پوچھے گئے تو شاہ محمود سے متعلق بات ہوگئی۔

جہانگیر ترین نے مزید کہا کہ میرا بیٹا آکسفورڈ میں پڑھائی میں مصروف ہے، میں الیکشن نہیں لڑرہا ، میرا بیٹا الیکشن نہیں لڑرہا، مگر ہر امیدوار میرا اپنا ہے، سیاست میں ڈیڈلاک بھی آتے ہیں اور ختم بھی ہوجاتے ہیں۔

مزید : قومی /علاقائی /پنجاب /لودھراں