آصف زرداری پنجاب میں تحریک انصاف پر بڑی ضرب لگانے میں کامیاب، سابق وزیر اعلیٰ کو اپنی پارٹی میں شامل کرلیا
لاہور(ڈیلی پاکستان آن لائن)پاکستان تحریک انصاف کے رہنما اور سابق وزیر اعلی پنجاب میاں منظور احمد وٹو نے سابق صدر آصف علی زرداری سے ملاقات کر کے دوبارہ پیپلز پارٹی میں شمولیت کا اعلان کر دیا ۔
نجی ٹی وی کے مطابق بلاول ہاؤس لاہور میں آصف زرداری اور منظور وٹو کے درمیان ہونے والی ملاقات میں سابق وزیر اعظم راجہ پرویز اشرف بھی موجود تھے ۔میاں منظور وٹو نے آصف علی زرداری کی صحت بارے بھی دریافت کیا۔ملاقات میں ملکی سیاسی صورتحال پر بھی غور کیا گیا۔
واضح رہے کہ اس سے قبل جون 2018ء میں میاں منظور احمد وٹو اپنے خاندان سمیت پیپلز پارٹی چھوڑ کر تحریک انصاف میں شامل ہوئے تھے جس کے بعد 2018ء کے عام انتخابات میں ان کے بیٹے جہانگیر وٹو اور بیٹی روبینہ شاہین وٹو کو اوکاڑہ سے تحریک انصاف کا صوبائی ٹکٹ جاری کیا گیا تھا جبکہ منظور وٹو نے آزاد حیثیت سے قومی اسمبلی کے انتخابات میں حصہ لیا تھا ۔