امریکی دھمکی کا جواب ،ایران نے خلیجی جزائر پر نئے میزائل سسٹم نصب کردیئے

تہران (ڈیلی پاکستان آن لائن )ایران کے پاسدارانِ انقلاب نے آبنائے ہرمز کے قریب 3 جزیروں پر نئے میزائل سسٹم نصب کیے ہیں۔
روز نامہ" جنگ" نے ایرانی میڈیا کی رپورٹ کے حوالے سے بتایا کہ نئے میزائل سسٹم آبنائے ہرمز کے قریب طنب الآبر آ، طنب الصغر آ اور ابو موسیٰ پر تعینات کئے گئے ہیں جو عالمی سطح پر ایک اہم سمندری راستہ ہے۔
رپورٹ میں بتایا گیا ہے کہ پاسدارانِ انقلاب نے حال ہی میں اس علاقے میں فوجی مشقیں کی ہیں۔
پاسدارانِ انقلاب نے یہ اقدام ایسے وقت پر اٹھایا ہے جب ایران امریکی صدر ڈونلڈ ٹرمپ کی جانب سے ملنے والے دھمکی آمیز خط کا جواب دینے کی تیاری کر رہا ہے۔
اس حوالے سے پاسدارانِ انقلاب کے نیول کمانڈر علی رضا تنگسیری کا کہنا ہے کہ ہم خطے میں دشمن کے ٹھکانوں، جہازوں اور اثاثوں پر حملہ کرنے کی صلاحیت رکھتے ہیں۔ نئے میزائل سسٹم 600 کلو میٹر یعنی 370 میل کے اندر کسی بھی ہدف کو مکمل طور پر تباہ کر سکتے ہیں۔
واضح رہے کہ امریکی صدر ڈونلڈ ٹرمپ نے خط میں ایران کو نئے جوہری معاہدے کے لیے 2 ماہ کی مہلت دی ہے اور ساتھ ہی دھمکی بھی دی ہے کہ اگر ایران نے جوہری پروگرام جاری رکھا تو نتائج بھگتنا پڑیں گے۔