تھنڈر کا ایک اور سنگ میل عبور، چین نے پہلا اوور ہالڈ جے ایف 17 پاکستان کے حوالے کر دیا 

بیجنگ(آن لائن)چین نے پہلا اوورہالڈ جے ایف تھنڈر17جنگی طیارہ پاکستان کے حوالے کر دیا۔چین کے سرکاری روزنامے گلوبل ٹائم نے چائنہ ایوی ایشن نیوز کے حوالے سے بدھ کو شائع ہونے والی اپنی ایک رپورٹ میں کہا کہ جے ایف تھنڈر17جنگی طیارہ کی اوورہالنگ اور ری اسمبلنگ چینی ایوی ایشن انڈسٹری کارپوریشن (اے وی آئی سی)نے کی ہے جبکہ طیارے کو مارچ میں پاکستان کے حوالے کر دیا گیا تھا۔انہوں نے کہا کہ یہ پہلی بار ہے کہ جے ایف 17کو اوور ہال کیا گیا ہے جو کہ جے ایف پراجیکٹ کا ایک سنگ میل ہے۔مذکورہ طیارے کا پہلا اوورہال ٹرائل اینڈ ارر پر مبنی تھا جو مستقبل میں دوسرے سنگل انجن ملٹی رول جے ایف طیاروں کی اوورہالنگ کا سٹینڈرڈ مقرر کرے گا۔چین اور پاکستان کی مشترکہ پیداوار جے ایف 17 نے 2003میں اپنی پہلی پرواز بھری تھی اور 2007 میں پاکستان کے حوالے کیا گیا۔طیاروں کی اوور ہالنگ کیلئے 2016میں ایک معاہدہ طے ہوا تھا اور پہلی اوورہالنگ کا آغاز نومبر2017میں شروع ہوا۔پہلے اوور ہالڈ طیارے نے اکتوبر 2018 میں کامیاب تجرباتی پرواز بھری۔اوورہالنگ میں طیارے کا مرکزی فریم اور انجن کی مرمت یا اس کی تبدیلی ہوتی ہے۔
جے ایف تھنڈر