انگلینڈ نے ورلڈکپ میں پاکستان کیساتھ مقابلے کیلئے ’پاکستانی‘ کی خدمات ہی حاصل کر لیں؟ یہ کون ہے اور کیا کرے گا؟ جان کر آپ کا سر بھی فخر سے بلند ہو جائے

لاہور (ڈیلی پاکستان آن لائن) آئی سی سی ورلڈکپ میں میزبان انگلینڈ نے سپنر ثقلین مشتاق کی بطور سپن باﺅلنگ مشیر خدمات حاصل کر لی ہیں جو میگا ایونٹ میں پانچ میچوں میں ٹیم کیساتھ رہیں گے جبکہ آسٹریلیا کے خلاف مشہور زمانہ ایشز سیریز میں بھی سپنرز کی رہنمائی کریں گے۔
تفصیلات کے مطابق انگلینڈ نے ورلڈکپ اور ایشز سیریز کیلئے ثقلین مشتاق کی بطور سپن باﺅلنگ مشیر خدمات حاصل کرلی ہیں۔ ثقلین مشتاق 30 مئی کو لندن روانہ ہو رہے ہیں جو پاکستان اور انگلینڈ کے درمیان میچ کے دوران بھی انگلش ڈریسنگ روم میں ہوں گے۔ ثقلین مشتاق کا کہنا ہے کہ انگلش اینڈ ویلز کرکٹ بورڈ (ای سی بی) کیساتھ میرا64 روز کا نیا معاہدہ ہوا ہے جس کے مطابق میں2 جون کو ٹیم جوائن کر لوں گا اور ورلڈکپ کے دوران چند دن تک پلیئرزکے ساتھ رہوں گا،اس دوران مجھے5 میچز میں سپنرز کی رہنمائی کرنا ہوگی۔
انہوں نے کہا کہ 3 جون کو نوٹنگھم میں پاکستان کیخلاف میچ میں بھی میری خدمات میزبان ٹیم کو حاصل ہوں گی۔ انہوں نے بتایا کہ میرا انگلینڈ کے ساتھ2 سالہ معاہدہ ختم ہو چکا اور اس دوران انگلش بورڈ کے اینڈریواسٹروس اور اینڈریو فلاور میرے کام سے کافی متاثر نظر آئے، سپنرز کی کارکردگی میں نمایاں بہتری سے بھی میری افادیت ثابت ہوتی ہے، انہوں نے کہا کہ آسٹریلیا سے ایشز سیریز کے دوران بھی میں انگلش ٹیم کے ساتھ رہوں گا، کوچ ٹریور بیلس اس کے بعد عہدہ چھوڑ رہے ہیں، ای سی بی چاہتا ہے کہ نئے کوچ اپنی ٹیم خود بنائیں اس لئے مجھ سے بھی ایشز تک کا معاہدہ کیا ہے۔ ثقلین مشتاق نے کہا کہ میرا دل ہمیشہ پاکستان کیلئے ہی دھڑکتا ہے، جب کبھی پی سی بی کو ضرورت ہوئی میں حاضر ہوں گا۔