طیارہ حادثہ، 19 افراد کی شناخت ہوگئی، سٹینڈ بائی ایئرہوسٹس انعم مسعود کو عین وقت پر سوار کرایا گیا

طیارہ حادثہ، 19 افراد کی شناخت ہوگئی، سٹینڈ بائی ایئرہوسٹس انعم مسعود کو عین ...
طیارہ حادثہ، 19 افراد کی شناخت ہوگئی، سٹینڈ بائی ایئرہوسٹس انعم مسعود کو عین وقت پر سوار کرایا گیا

  

کراچی (ویب ڈیسک) لاہور سے کراچی آنے والے پی آئی اے مسافر طیارہ حادثے میں جاں بحق 97 افراد میں سے 19 کی شناخت کر لی گئی ہے،ایک ایئرہوسٹس کو عین روانگی کے وقت طیارے سے اتار کر اسٹینڈ بائی ائر ہوسٹس انعم مسعود کو سوار کرایا گیا۔

روزنامہ جنگ کے مطابق ہوائی جہاز ماڈل کالونی کے علاقے جناح گارڈن کی آبادی پر گرا، عینی شاہدین کا کہنا ہے کہ پائلٹ نے ڈولتے طیارے کو اوپر اٹھانے کی کوشش بھی کی لیکن درمیان میں ایک 4 منزلہ عمارت آگئی، جس سے طیارے کا پچھلا حصہ بلند عمارت سے ٹکرایا اور طیارہ مکانوں پر آ گرا، طیارے میں عملے کے 8 ارکان سمیت 99 افراد سوار تھے۔

پی آئی اے نے حادثے کا شکار طیارے کے مسافروں کی فہرست جاری کردی، مسافروں میں 51 مرد مسافر،31 خواتین اور 9 بچے شامل ہیں جبکہ سینئر صحافی اور ٹوئنٹی فور نیوز کے ڈائریکٹر پروگرامنگ انصار نقوی بھی طیارے پر سوار تھے۔

ایئربس اے 320 کے کاک پٹ اور کیبن کریو کا تعلق لاہور سے تھا، کیپٹن سجاد گُل طیارہ اڑا رہے تھے اور فرسٹ آفیسر عثمان اعظم ان کے ساتھ تھے، دیگر عملے میں 3 اسٹیورڈز اور 3 ایئرہوسٹس تھیں۔حادثے کا شکار طیارے کے بلیک باکس کا اہم حصہ کوئیک ایکسِس ریکارڈر مل گیا ہے جبکہ حادثے کی تحقیقات کے لیے وزیراعظم کی منظوری سے 4 رکنی تحقیقاتی ٹیم تشکیل دے دی گئی، جس کی سربراہی ایئرکموڈور محمد عثمان غنی کریں گے، ایک ماہ میں ابتدائی تحقیقات مکمل کی جائیں گی۔

ادھر پائلٹس کی تنظیم پالپا نے تحقیقات میں حساس اداروں اورانٹرنیشنل فیڈریشن آف ایئرلائن ایسوسی ایشن کے نمائندے شامل کرنے کا مطالبہ کیا ہے۔

مزید :

قومی -