آج کا پاکستان 2013 ء سے با لکل مختلف ، معیشت مستحکم ہو رہی ہے ، گورنر سندھ

آج کا پاکستان 2013 ء سے با لکل مختلف ، معیشت مستحکم ہو رہی ہے ، گورنر سندھ

کراچی (این این آئی)گورنر سندھ محمد زبیر نے کہا ہے کہ پاکستان کا مستقبل روشن اور تابناک ہے ، آج کا پاکستان 2013 ء سے با الکل مختلف ہے ، امن و امان اور قومی معیشت مستحکم ہو رہی ہے ،پورے ملک میں معاشی ، صنعتی ، ثقافتی ، سماجی ، ادبی اور دیگر سر گرمیاں جاری ہیں غیر ملکی سرمایہ کاری میں تسلسل سے اضافہ ہو رہاہے ، نجی سیکٹر کے فعال کردار سے بے روزگاری اور غربت کے خاتمہ میں مدد مل رہی ہے ۔ سی ای او کلب کا قیام خوش آئند ہے اس کے ذریعہ قومی معیشت کے فروغ اور ایک دوسرے سے سیکھنے کے بھرپور مواقع میسر آئیں گے ،معیشت کے استحکام کے لئے اس طرح کے اقدامات اہم ثابت ہو سکتے ہیں۔ ان خیالات کا اظہار انہوں نے 16 ویں پری سی ای او سمٹ ایشیا سے خطاب میں کیا ۔ اس موقع پر وفاق ایوان ہائے صنعت وتجارت کے صدر زبیر طفیل ، ایس ایم منیر، سینیٹر عبد الحسیب خان ، مرزا اختیار بیگ اور ملک بھر سے آئے ہوئے 200 سے زائد کمپنیوں کے چیف ایگزیکٹیو افسر موجود تھے ۔ گورنر سندھ نے کہا کہ حکومت کو دو بڑے چیلنجز درپیش تھے جن میں امن و امان اور سنگین بجلی بحران شامل ہے ، حکومت نے ان دونوں چیلنجز کو قبول کرتے ہوئے شب و روز محنت کی ، آج اس کے نتائج سب کے سامنے ہے ، پورے ملک میں امن و امان کی صورتحال بہت بہترہوچکی ہے بجلی کا بحران بھی کافی حد تک ختم ہو چکا ہے ،توانائی منصوبوں کی تکمیل کے ساتھ ساتھ بجلی بھی آرہی ہے تمام توانائی منصوبے تکمیل کے آخری مراحل میں ہیں بہت جلد بجلی بحران نہ صرف ختم ہو جائے گا بلکہ ہم اپنی ضروریات سے زائد بھی حاصل کرنے میں کامیاب ہو جائیں گے ۔ پاکستان کی معاشی شہ رگ کراچی کے حالات اس قدر خراب ہو چکے تھے کہ کوئی بھی غیر ملکی سرمایہ کار کراچی آنے سے کتراتے تھے ،معاشی سرگرمیاں بھی ماند پڑچکی تھی لیکن آج صورتحال میں واضح فرق ہے ، شہر ایک بار پھر روشنیوں کا شہر بن رہا ہے ، رات گئے تک معاشی ، سماجی ، ثقافتی ، ادبی ، صنعتی سمیت دیگر سرگرمیاں جاری ہیں ، حکومت کا بھرپور فوکس امن و امان کے تسلسل پر ہے ۔ 90 فیصد سے زائد معاشی شعبوں کے مرکزی دفاتر کراچی میں ہیں دنیا بھر کی ملٹی نیشنل کمپنیوں کے دفاتر شہر میں ہیں جس سے اس شہر کی اہمیت کا اندازہ بخوبی لگایا جا سکتا ہے ، شہر میں بھرپور استعداد ہے غیر ملکی سرمایہ کار کراچی میں سرمایہ کاری کو ترجیح دے رہا ہے ، نجی سیکٹر کے فعال کردار سے مقامی لوگوں کو روزگار کے وسیع مواقع دستیاب ہورہے ہیں ۔زبیر طفیل نے کہا کہ سی ای او کلب ایک اچھا اقدام ہے ، اور اس طرح کے پروگرامز کے انعقاد سے ایک دوسرے کو سمجھنے اور معاشی سرگرمیوں میں اضافہ کرنے میں مدد ملے گی ۔ سینیٹر عبد الحسیب خان نے کہا کہ سی ای او کلب خوش آئند ہے اس سے قومی معیشت میں بہتری یقینی ہے ۔سی ای او کلب کے بانی صدر اعجاز نثار نے بھی خطاب کیا۔

گورنر سندھ

 

مزید : راولپنڈی صفحہ آخر

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...