کراچی واقعے کی انکوائری رپورٹ کو چھپایا گیا تو یہ ہم نہیں ہونے دیں گے : مریم نواز

کراچی واقعے کی انکوائری رپورٹ کو چھپایا گیا تو یہ ہم نہیں ہونے دیں گے : مریم ...
کراچی واقعے کی انکوائری رپورٹ کو چھپایا گیا تو یہ ہم نہیں ہونے دیں گے : مریم نواز

  

لاہور (ڈیلی پاکستان آن لائن ) مسلم لیگ ن کی رہنما مریم نواز نے کہا ہے کہ کراچی واقعے کی انکوائری کے لئے اگر بلایا گیا تو ضرور جاؤں گی ، کراچی واقعے کی انکوائری رپورٹ جب مکمل ہو تو اسے پبلک کیا جائے اگر اسے چھپایا گیا تو یہ ہم نہیں ہونے دیں گے۔

بلوچ  طلباء کے ساتھ اظہار یکجہتی کے لیے دھرنے میں پہنچنے پر میڈیا سے گفتگو کرتے ہوئے مریم نواز کا کہناتھاکہ جمہوریت میں نوٹس حکومت کو عدلیہ کو لینا چاہیے کسی اور کو نہیں لینا چاہئیے، وزیر اعلی سندھ نے جو تفصیلات مجھے بتائیں وہ بہت حیران کن تھیں کہ کیسے اس ملک میں آپریٹ کیا جاتا ہے، یہ ساری تفصیلات انکوائری رپورٹ میں سامنے آئیں گی، حکومت جس طرح بوکھلا گئی ہے مجھے لگتا ہے یہ جنوری سے بھی بہت پہلے چلی جائے گی۔

ان کا مزید کہنا تھاکہ کراچی میں جو کچھ ہوا اس سے واضح ہو گیا کہ ملک میں کس کی حکومت ہے ، عمران خان تو ڈمی ہے، نواز شریف کی بات سچ ثابت ہو گئی کہ ریاست سے بالا ریاست کام کر رہی ہے, طلباء پاکستان کا مستقبل ہیں، لیکن ڈی جی خان، راجن پور، فاٹا اور بلوچستان کے بچے سڑکوں پر رل رہے ہیں، ان کی 600 سیٹیں واپس لے لی گئی ہیں, یہ کہتے ہیں پنجاب بڑا بھائی ہے، لیکن میں کہتی ہوں کہ بلوچستان بڑا بھائی ہے۔

انہوں نے مطالبہ کیا کہ طالب علموں کا کوٹہ بحال کرنا چاہیے، بچے تعلیم کا حق مانگ رہے ہیں اور کسی نے ان سے ملاقات نہیں کی، میں کل کوئٹہ جا رہی ہوں، وہاں بھی طلباء کا مسئلہ اٹھاؤں گی,شہباز شریف نے دل سے پنجاب کی خدمت کی، یہ احسان نہیں، عوام کا حق ہے جو انہیں ملا، نواز شریف کے بغیر پاکستان اور شہباز شریف کے بغیر پنجاب لاوارث ہو گیا ہے, شہباز شریف کو کرپشن کی وجہ سے جیل میں نہیں رکھا گیا بلکہ انہیں بھائی سے نہ لڑنے کی سزا دی جا رہی ہے, حالات و واقعات نے ثابت کیا کہ غلط فیصلے کے اثرات سامنے آتے ہیں، ملک میں آٹا، چینی سب کچھ مہنگا ہو رہا ہے۔

مزید :

قومی -