شعیب ملک نے سینئر ہونے کا حق ادا کر دیا :سرفراز احمد
ابوظہبی(یواین پی) قومی کرکٹ ٹیم کے کپتان سرفراز احمد کا کہنا ہے کہ شعیب ملک نے سینئرہونے کا حق ادا کردیا، ان کی اننگز کی جتنی بھی تعریف کی جائے وہ کم ہے۔تفصیلات کے مطابق ایشیا کپ کے سنسنی خیرمیچ میں افغانستان کو شکست دینے کے بعد قومی کرکٹ ٹیم کے کپتان سرفراز نے گفتگو کرتے ہوئے کہا کہ امام الحق اور بابراعظم نے بہترین بیٹنگ کی۔انہوں نے کہا کہ شعیب ملک نے سینئرہونے کا حق ادا کردیا، ان کی جتنی بھی تعریف کی جائے وہ کم ہے۔سرفراز احمد نے کہا کہ افغانستان کے خلاف میچ میں فیلڈنگ خراب ہوئی اور کیچز بھی ڈراپ ہوئے، اگلے میچز میں فیلڈنگ کو بہترکرنا ہوگا۔قومی کرکٹ ٹیم کے کپتان نے ایک سوال کے جواب میں کہا کہ افغانستان نے بہت اچھی بیٹنگ کی جبکہ میرے خیال میں افغانستان کے اسپنرزبہترین بولرزمیں شامل ہیں۔یاد رہے کہ گزشتہ روز متحدہ عرب امارات کے شہر ابوظہبی میں ایشیا کپ کے سپر4 مرحلے کے میچ میں پاکستان نے افغانستان کو سنسنی خیز مقابلے کے بعد 3 وکٹوں سے شکست دے دی تھی۔پاکستان کو آخری اوور میں جیت کے لیے دس رنز درکار تھے۔ شعیب ملک نے آخری اوور میں ایک چھکا اور چوکا لگا کرپاکستان کو فتح سے ہمکنار کروایا۔