تمام سیاستدان انتخابات سے قبل حفاظی ضمانت کروالیں، پرویز الٰہی کا مشورہ 

                                                                        اسلام آباد (مانیٹرنگ ڈیسک، نیوز ایجنسیاں) سابق وزیراعلیٰ پنجاب، پاکستان تحریک انصاف کے صدر چودھری پرویز الٰہی نے کہا ہے جو حالات ہیں اس میں تمام سیاستدانوں کو انتخابات سے قبل حفاظتی ضمانت کروالینی چاہیے۔اسلام آباد کی انسداد دہشت گردی کی عدالت میں چودھری پرویز ا لٰہی نے صحافیوں سے غیر رسمی گفتگو میں کہا میری رہائی کی بات اللہ تعالیٰ ہی بہتر جانتے ہیں، چیئرمین پی ٹی آئی سے بیک ڈور مذاکرات پر کچھ نہیں کہہ سکتا، چودھری شجاعت سے دوبارہ ملاقات ہوئی۔صحافی کے اس سوال پر کہ بلاول زرداری کا کہنا ہے شیخ رشید اور پرویز الٰہی اندر رہیں یا باہر کوئی فرق نہیں پڑتا، پرویز ا لٰہی نے جواب دیا بلاول بھٹو کو اپنی سالگرہ خوشی سے منانے دیں۔ان کاکہناتھا جیل کا کھانا دیا جاتا ہے جس سے طبیعت ناساز رہتی ہے، جیل میں پہلے ڈاکٹر کی سہولت میسر تھی، اب ان کو اس میں بھی مسائل نظر آنے لگے ہیں۔ بجلی مہنگی ہونے کے اصل ذمہ دار نواز شریف اور شہباز شریف ہیں، آج مہنگائی سے عام آدمی ختم ہو چکا ہے، عام انتخابات نہ ہونے سے ملک کا نظام رُکا ہوا ہے۔صحافی کے سوال پر کہ سننے میں آ رہا ہے نواز شریف کی ملک واپسی کی تاریخ بدل رہی ہے؟،تو جواب میں پرویز الٰہی نے کہا نواز شریف خود بھی بدل گئے ہیں۔

 پرویز الٰہی

اسلام آباد (مانیٹرنگ ڈیسک، نیوز ایجنسیاں) چیئرمین پی ٹی آئی کی پیشی کے موقع پر توڑ پھوڑ سے متعلق کیس کی سماعت میں پرویز الہی کو جوڈیشل ریمانڈ مکمل ہونے پر پیش کیا گیا، عدالت نے پرویز الٰہی کی تھانہ سی ٹی ڈی میں درج مقدمے میں ضمانت منظور کر رکھی ہے۔پرویز الٰہی کی جانب سے اہل خانہ سے ملاقات کیلئے درخواست دائر کر دی گئی اس پر جج ابو الحسنات ذوالقرنین نے پوچھا ضمانت منظور ہو چکی ہے، کیا مچلکے جمع نہیں کروائے؟ مچلکے جمع کروادیں اگر کہتے ہیں تو کیش میں کردیتا ہوں، کیا پرویز الٰہی صاحب دوسرے کیسز میں جوڈیشل ریمانڈ پر ہیں؟وکیل سردار عبدالرازق نے کہا جی اینٹی کرپشن سے متعلق مقدمے میں جوڈیشل ریمانڈ پر ہیں، ہماری طرف سے تو مچلکے جمع کروانے پر آزاد ہیں۔اس دورا ن پرویز الٰہی روسٹرم پر آگئے اور کہا میرا پیٹ خراب ہے، جج نے کہا اللہ خیر کریگا، پرویز الٰہی نے کہا میرے سیل کے باہر بھی دیوار کھڑی کر دی گئی ہے،تازہ ہوا تک نہیں آتی،سیل کے باہر ایک اجنبی کو بٹھایا ہوا ہے۔جج نے استفسار کیا اجنبی کون ہے؟ کیا اس کا نام ہی اجنبی ہے؟ چلیں پتا کرتے ہیں اجنبی کون ہے، جج نے کہا پرویز الٰہی لاہور میں درج اینٹی کرپشن کیس میں جوڈیشل ریمانڈ پر ہیں،کیا اس میں ضمانت کی درخواست دائر کی ہے؟وکیل نے جواب دیا جی! اینٹی کرپشن کیس میں بھی ضمانت کی درخواست دائر کرر کھی ہے، عدالت سے استدعا ہے کوئی لمبی تاریخ دے۔جج نے کہا ہمارا کیا ہے ہم 40 دن بعد کی تاریخ دے دیتے ہیں، عدالت نے 13 اکتوبر تک سماعت ملتوی کردی۔

کیس پیشی