قوم متحد رہے ، کولمبو دھماکوں میں بین الاقوامی نیٹ ورک ملوث، سری لنکن وزیر اعظم

کولمبو (صباح نیوز)سری لنکا کے دارالحکومت کولمبو میں دھماکوں سے ہلاک ہونے والوں کی تعداد 310 ہو گئی ، واقعہ میں 500 سے زائد زخمی ہیں جبکہ پولیس نے 40 افراد اب تک گرفتار کر لیے ۔سری لنکن حکام نے کہا کہ500افراد زیر علاج ہیں ، بعض کی حالت تشویشناک ہے، حملوں میں بین الاقوامی نیٹ ورک ملوث ہے، منگل کو ان ہلاکتوں پر ملک میں سرکاری سطح پر سوگ منایا گیا جبکہ ہلاک شدگان کی آخری رسومات کی ادائیگی بھی شروع ہو گئی۔سری لنکا کے وزیر اعظم رانیل وکرما سنگھے نے ٹوئٹر پر ایک پیغام میں کہا کہ معصوم جانوں کے ضیاع پر سری لنکا سوگ منا رہا ہے۔ انھوں نے مزید کہا کہ اس ناقابل بیان المیے کے تناظر میں یہ ضروری ہے کہ ہم سری لنکن بطور قوم متحد رہیں۔ہلاک شدگان کی یاد میں منگل کی صبح ساڑھے آٹھ بجے ملک بھر میں تین منٹ کی خاموشی اختیار کی گئی۔ یہ وہ لمحہ تھا جب پہلا دھماکہ ہوا تھا۔ یومِ سوگ کے موقع پر ملک بھر میں پرچم سرنگوں رہے اور عوام نے مختلف مقامات پر جمع ہو کر ہلاک شدگان کو خراجِ تحسین پیش کیا۔صدر متھری پالا سری سینا نے تحقیقات میں غیرملکی مدد لینے کا اعلان کردیا۔حکومت کے ترجمان راجیتھا سینارتنے کے مطابق صرف مقامی لوگوں کا ایک چھوٹا گروپ ایسے حملے نہیں کرسکتا، انٹرنیشنل نیٹ ورک کی موجودگی کے بغیر یہ حملے کامیاب نہیں ہو سکتے تھے۔انہوں نے یہ بھی کہا کہ ان حملوں کے متعلق بین الاقوامی تعاون اور دوسرے رابطوں کی تحقیقات کر رہے ہیں کہ کیسے خودکش بمبار تیار کیے گئے اور اس طرح کے بم یہاں کیسے بنائے گئے۔ملک میں ایمرجنسی نافذ ہے، جبکہ رات 8 بجے سے صبح 4بجے تک کرفیو بھی نافذ کیا گیا ۔سری لنکا میں ایسٹر کے موقع پر ہونے والے ہولناک دہشت گرد حملوں میں ڈنمارک کے امیر ترین شخص اور اسکاٹ لینڈ کے سب سے بڑے زمیندار سمجھے جانے والے شخص آندرس ہولش پاؤلسن کے 3 بچے بھی ہلاک ہوئے ۔
سری لنکا

کولمبو(مانیٹر نگ ڈیسک) سری لنکن وزیر دفاع رووان وجے وردانے نے دعویٰ کیا ہے کہ ایسٹر کے موقع پر ملک میں ہونے والی دہشت گردی کرائسٹ چرچ حملے کے جواب میں کی گئی ہے۔غیر ملکی میڈیا کے مطابق وزیر دفاع نے پارلیمنٹ میں بیان دیتے ہوئے کہا کہ ابتدائی تحقیقات کے بعد معلوم ہوا ہے کہ اتوار کے روز گرجا گھروں اور ہوٹلوں پر ہونے والے دھماکے نیوزی لینڈ کے شہر کرائسٹ چرچ میں دو مساجد پر ہونے والے حملے کے ردعمل کے طور پر کیے گئے۔وزیر دفاع رووان وجے وردانے نے کہا کہ حملوں میں نیشنل توحید جماعت ( این ٹی جے) ملوث ہے جسے مقامی گروپ جمعیت ملت ابراہیم ( جے ایم آئی) کی مدد حاصل تھی۔وزیر دفاع نے کہا کہ فوری طور پر اس جماعت کو کالعدم قرار دینے کی ضرورت ہے اور تنظیم سے وابستہ تمام افراد کو گرفتار کرنا چاہیے۔دوسری جانب مسلم کونسل آف سری لنکا کے صدر این ایم امین کا کہنا ہے کہ ابتدائی طور پر ہمیں جتنا علم ہے، اس طرح کی تنظیمیں مسلمانوں کی بدنامی کا باعث بنتی ہیں، ہمارے پاس اس تنظیم کے عالمی سطح پر تعلقات سے متعلق معلومات نہیں ہیں۔کولمبو اور دیگر علاقوں میں اتوار کے روز ہونے والے 8 دھماکوں میں ہلاکتوں کی تعداد 310 تک پہنچ گئی اور 400 سے زائد زخمی ہیں، حملے کے بعد کم از کم 40 افراد کو حراست میں لیا گیا اور ملک بھر میں ہنگامی حالت نافذ کی گئی جو اب بھی برقرار ہے۔
سری لنکن وزیر دفاع کا دعویٰ